Rusya tiene las mas grande tyerras en el mundo. Es mas de 17.000 Km2. Las tyerras son de la Evropa fina la punta de Asia. Por esto la kultura es muy ancha. En el Oksidente es komo los paizes Baltikos, por el Sud es komo los paizes de Asia Sentral i por el Oriente es komo los paizes del Leshano Oriente. En todo kavzo tiene una kultura diferente de todos los paizes. Mos desidimos ir a Rusya. Dishimos no mos iremos solo a Moskova i por 3 diyas vijitaremos i a St. Petersburg. Reelmente konosimos un paiz i dos kulturas. En Moskova vimos ke esta mas serrado un paiz, tipiko de una kapital de un paiz, St.Petersburg paresiya a una sivdad Baltika.
En Moskova kaminimos la Plasa Kolorada, La Tomba de Lenin, La Katedral de St. Vasil, La Guerta de Gorki, el Teatro Bolshoy, El Muzeo de Istorya i el Palasyo de Kremlin. Un diya izimos el tur del Rio kon Vaporiko, mos fuimos a Arbat Street ke es una kaye serrada al trafiko. Mos disheron las Istasyones del Metro son muy enteresante i shik mos fuimos para ver unas kuantas. Reelmente estavan kada una komo muzeos. Las pinturas, la arshitektura, los arkos estavan muy ermozos i enteresantes. Malorozamente mozotros ke topamos los kaminos muy fasil en los metros aki un poko mos vino difisil. Porke las letras eran alfabe de Kiril; no aviya ni un letra en Latin.
Kuando vinimos a St. Petersburg mos kedimos en un otel ke estava en la kaye la mas savida, Nevsky. A todos lugares turistikos estava serka. Mos fuimos a la Kadetral St. Isaak i la Katedral Kazan, izimos un tur en los kanales kon vaporiko antes de azer el tur vijitimos la Iglesiya Voskresenia Khristova.
I aki los muzeos estavan muncho komo Moskova. El mas grande i ke tiene objetos aryento es Hermitaj. Oy es muzeo ama antes en el tiempo de la Charicha II. Katerina era palasiyo de la Dinastiya.
En la Gastronomiya de los Rusos lo mas muncho ke se konose son La karne Stroganoff, la Gayna Kievski, el Havyari, Animales de Kasa, taushan, gazela, geyik, i pato salvaje. La supa Borsh dizen ke es de los Rusos. El Havyari se konose por el mundo entero ke es muy savrozo. I mozotros merkimos unos kuantos kavanozes chikos de Havyari de las botikas ande se vende solo Havyari. Una vez komimos en un lugar Krep aryento kon Havyari. Mos vino muy enteresante. Fin agora komimos kon kezos, kon materyales de Sharkuteri, komo salami, kon frutas ets. Ma no aviya komido fin akel diya Krep kon Havyari.
Si vinimos al kavzo del la eskritura de los dulses del mundo, empesare kon Pavlova. El nombre viene de la Balerina Rusa, Anna Pavlova en el kontinente de Oseano en Australia primera vez izyeron este dulse, la Tort Pavlova. En el titolo ke lo eskrivi la pasta Medovik viene el nombre de Miel. Los Rusos utulizan muncho en las pastas i tambiyen en las komidas Miel.
