El 75. Festival de Berlin ke tuvo lugar en febrero, deskruvyo un muy grande direktor. El eskrivano norvejyano, Dag Johan Hangerud gano el premyo del Lonso de Oro kon el filmo Los Esfuenyos.
Este filmo, tuvo komo sujeto, el amor, los sentimyentos de una manseva ke tuvo por su profesor de fransez, i los efektos ke uvo en su famiya.
Una letra de amor ke fue eskrita a Oslo, fue el sujeto del filmo ke fue una drama yena de emosyon intensa, sovre la transizyon a la edad adulta entre kuatro mujeres.
Hangerud, un novelisto eksperimantado, eskrivyo el senaryo en utilizando los dialogos rikos i kon grande kontenido. Los Esfuenyos en el anyo 2025 fue el filmo el mas reushido porke el reuniso en este filmo la literatura i el sinema.
El grande premyo de Lonso de Plata fue ganado por Gabriel Maskaro, el brezilyano, kon el filmo El Kamino Blu.
El premyo del juri fue ganado por Ivan Fund kon El Mensaje.
EL FESTIVAL DE CANNES:
Komo estan kritikando el rejim opresivo de sus paizes, son defendidos de viajar a los paizes etranjeros, estan azyendo filmos ke produsyeron en sekreto, i estan reushendo a embiyarlos a las kompetisyones enternasyonales mizmo ke es defendido.
Tomando riskos reeles por el arte del sinema, rezistyendo a la presyon del governo i bushkando la verdad, suportando las difikultades i partisipando a los festivales internasyonales, empesan la kompetisyon kon un avantaje de 1-0.
Bivimos esta verdad tambyen en el 78. Festival de Filmo de Cannes, entre tres, kuatro filmos de mizma kalita, eskojyeron Un Simple Aksidente.
El filmo, La Valor Moral de Joachim Trier gano el premyo segundaryo.
Jafar Panahi es un luchador por la liberta, el korason korajozo del sinema, el aktivisto fervente de la demokrasiya, uno de los direktores sin espanto del mundo, kon el filmo El Ajan Sekreto gano el premyo: el mijor aktor Feminino i Maskulino. Todos lo aplodisaron a este aktivisto de la demokrasiya en el festival del filmo de Cannes.
EL FESTIVAL DE VENEZIA
En el 82en Festival de filmo en Venezia, el premyo de Leon de Oro fue ganado por Jim Jarmusch kon los filmos, Padre, Madre, Ijika, Ijiko/ Father, Mother, Sister, Brother.
Este filmo fue una sorpresa para todos. El direktor eksperimantado, mos esta kontando tres diferentes istoryas de famiyas ke estan pasando en la Amerika, Fransa i Ingletierra.
Los ermanos ke se espartyeron, se reunisan para resolver unos problemes mizmo ke no keren, esto es el sujeto de este filmo. El grande premyo de Juri, Leon de Plata fue ganado por Kaout her Ben Hania kon el filmo La Boz de Hind Rajab ande konto una istorya verdadera de la vida.
El filmo esta pasando en un lugar ande estan lavorando los volontaryos palestinyanos. Estan tomando una yamada urjente de Gazza ande los soldados Israelyanos estan bombardeando, i una ijika de sesh anyos ke esta bivyendo i ke kedo enserrada en una araba, esta asperando ke la salven.
Este filmo esta konsiderado komo un dram aktuel, porke los volontaryos estan avlando kon la ijika kon el telefon una ora, para darle moral i dizirle ke la ambulans esta en el kamino i se esta indo para salvarla.
Valérie Donzelli i Gilles Marchand kon el filmo, En la kavesa del Echo/ At Work gano el Mijor Premyo de Senaryo.
Toni Sevillo gano en el filmo La Grazia kon su performansa ekstraordinarya el premyo de: El Mijor Ombre Djugador.
