El karizma de una persona es el sekreto de su sukseso. Es un manyetizmo, una luz interior ke inspira, atira i mobiliza. Este
modo de persona kon su atraktividad i su fuerte personalidad puede influensar i dar inspirasion a los de su rededor.
El karizma es mas ke un talento o una kalitad personal. Es un regalo de nasimiento. La palavra karizma sinyifika “el dono epiritual” en la Biblia. Kuando una persona karizmatika entra en un lugar todos la miran. El karizma se puede desvelopar kon las kapachedades ke se ganan durante la vida. El buen kontakto de ojos, la forma de vistirse, el tono de avlar, la enerjia pozitiva, todos atiran las personas i se azen ver en las komunidades. Kon estas kalitades ganan respekto i todos son prontos para oyir i entender sus
sentimientos.
Los lideres karizmatikos son personas ke proyektan konfiensia, otentisidad,
entuziazmo i tienen la ekselente abilidad de komunikasion. Kon sus ideas muevas, kondusen a avrir muevos kaminos en los pensamientos i en el
adelantamiento.
El primer ke eskrivio sovre el karizma fue el sosiologo aleman, Max Weber. El dize ke el karizma es la spesialidad de las personas ke se apartan de los ombres ordinarios porke son dotados de enerjias i kalidades
eksepsionales.
El karizma es un regalo ke si se uza bien puede ser una fuersa grande para unir a la djente, lo ke nesesitamos lo mas muncho en los dias de oy.
