Ya savemos ke los paizes de la mar Baltika son Danimarka, Suezia, Estonya, Finlandya, Almanya, Letonya, Litvanya, Poland i Rusya. Una vez kuando mos fuimos kon el Cruisero al tur Baltiko empesimos al tur de Stockholm ke es la kapital de Suezia. Mos fuimos 2 diyas antes a Stockholm para ver i kaminar aya. Los lugares turistikos eran Gamla Stan, Vasa Museum, el premio ke dan del Nobel, el Palasyo del rey, el edifisyo de la munisipalidad. Vasa Museum estava muy entyeresante. Sigundo diya izimos el tur kon vaporiko en el bodre de mar. Aya vimos las izlas chikas ke son 14 deyas. El vaporiko se estava indo komo kulevra porke las izlas estavan una aryento de otra. Despues suvimos a una montanya chika ke se yama Monteliusvagen. De aki vimos la sivdad Panoramika. El tur del Cruisero empeso de Stockholm. En el tur de 7 diyas en primero se abordo a Helsinki, kapital de Finlandiya, despues a Riga, kapital de Letonya, despues a Gdansk, una sivdad Polaka, despues a Vispy, un izla de Suezia. Era la primera vez ke estavamos indo a los paizes Baltikos i mos vino muy diferente i interesante. En Helsinki mos fuimos en primero a la plasa del Senato i a la Katedral de Helsinki. A esta Katedral de la plasa se suve kon una eskalera de 52 eskalones. Despues a Old Market Hall a la Katedral Uspenski, a la Iglesya ke se fraguo aryento de una montanya, Temppeilaukio. En las kayes de Helsinki ay botikas de materyales ke se vende para Sauna. Las Saunas de Finlandiya son famozas. Kuando vinimos a Riga, la kapital de Letonya, empesimos del bodre de la mar kaminando para irmos a la sivdad vieja, vimos la Katedral de Riga, entrimos de la puerta Swedish Gate, vimos la kaza de 3 ermanos Three Brothers, despues a la kaza ke se yama de las Kavezas Pretas, la Iglesiya St. Peter’s, las kazas i la plasa de Art Nouveau, i la Sinagoga de Riga. Despues vinimos a Poland, a la sivdad Gdansk ke se yamava antez Danzing. Empesimos al tur de Westerplatte, una peninsula. Aki ay en la mar una nave de Piratas. Puedesh azer tur kon esta nave i puedesh bivir por medya ora los tiempos viyejos. Kuando entrimos de aki a la sivdad vieja Golden Gate kaminimos en las kayes, Artus Courti, Mariacka Street i Dluga Street.
En el kamino mos salyo enfrente la Iglesya St. Marys; suvimos al tejado de la Iglesya i vimos la sivdad de aki komo panoramika. En la keye ke estava el trafiko serrado vimos el monumento de Neptune’s Fountain. Visby era una izla chika; kaminimos unas kuantos guertas ma aviya luvya por esto tornimos al Cruisero. En el ultimo dia del tur Baltiko vimos la asosyasyon de arkitektos i Gastronomiya.
Si vinimos al kavzo de la eskriturya, komo dishe la gastronomiya paresiya muncho a la de los paizes ke vos konti. En los paizes Baltikos komen mas muncho panes de senteno, sereal komplikado, levadura agra ets. Por esto la dulsurya ke es mas savido i se prefara en los paizes Baltikos es RUPJMAIZES KARTOJUMS. Se apareja kon pan de senteno, krema i frutas i ensima shokala mulinada.
