Timothée Chalamet gano el premio del globo de oro, deshando atras sus fuertes kompetidores komo Leonardo DiCaprio i George Clooney. Chalamet gano el Globo de Oro por el Mijor Aktor por su rolo de un champion de tenis de meza (ping pong) judio en el filmo "Marty Supreme". Este fue su primer Globo de Oro duspues de kuatro nominasiones. Este rezultado se konsidero una reushita sinyifikativa del mansevo aktor en Hollywood. Los Globos de Oro son konsiderados una de las seremonias de premios los mas emportantes antes de los Oskares. Por modo de esto, la reushita de Chalamet se enterpreto komo una fuerte entrada a los Oscares.
El filmo "Marty Supreme" esta kontando la istoria de un korajozo mansevo luchando para azerse la superestreya del tenis de meza. Noche de Alhad, en akseptando su premio, Chalamet remersio a Safdie, a los aktores del filmo, a su famiya i a su havera, Kylie Jenner.
Timothée Hal Chalamet nasio en Manhattan, ijo de Nicole Flender, balerina, i Marc Chalamet, editor de UNICEF. Su madre es judia de desendensia judia rusa i polaka. Su padre, orijinario de Nimes, Fransia, tiene asendensia franseza i ingleza. Su padre es ermano de la artista Pauline Chalamet, sovrina del direktor Rodman Flender i inyeta del senaristo Harold Flender. Timothee se engrandesyo en una famiya de artistos, aparesiendo en publisidades, en la shena teatral, asistio a la Eskola Segundaria de Muzika, Arte i al Lise La Guardia, ande fue amigo de klase del aktor Ansel Elgort. Los dos aviyan resivido sus primeras nominasiones al Globo de Oro en el mezmo anyo, en 2017. Durante un tiempo, Timothée tambien asistio a la Universidad de Columbia.
Antes de este premio, Chalamet fue nominado kuatro vezes por el Globe de Oro por sus filmos "Call me by your name/Yamame por tu Nombre " (2018) de Luca Guadagnino i "A Complete Unknown/Un DeskonosidoTotal" (2025) de James Mangold.
Duspues de su ekstraordinaryo rolo en la istoria de tranzision a la adultez del tema omoseksual de Guadagnino, Chalamet tuvo una rapida suvida en su kariera de filmos.
"Esta kategoria esta yena de talento. Vos admiro a todos vozotros" disho Chalamet a sus kompetidores en la shena.
