Empesijo bueno diziyan los grandes antes, kuando se empesava una koza mueva. I todos kon esta dicha ermoza empesimos a la anyada mueva, para eskrivir una istorya de 365 pajinas. Kaji dospues de 3-4 dias, ya estamos eskapando de eskrivir las 30 pajinas, ke presto paso el mez, vas a dizir komo pasaron los anyos? Keremos ke este la istorya ke empesimos a eskrivir, sea yeno de rizas, de alegriyas, i el sujeto ke sea solo sanedad, i pas, i mozos kon grande savor lo eskriveremos. Por esto siempre kale mirar a delantre, el anyo ke pasimos mos ambeza munchas kozas, los yerros ke izimos, la valor de la vida, la valor de los amigos, de la famiya, las ganansias, todo es komo una leson, lo importante es ke de agora en delantre lo ke mos ambezimos, es pasar la vida para mirar siempre a delantre. La vida mos ambeza pasensia, mos ambeza ke asperar es siempre pedrer, por esto a la vida le plaze siempre agora, no dospues. Komo dishimos en el prisipyo, empesijo bueno, si empesijo bueno empesa de mozos. Si puedemos ver muestras faltas, si mos salvamos de los selos, de los egos, akel tiempo ya estamos en kamino bueno, agora puedemos dizir, empesijo bueno.
Esto parese, komo un djugo de domino, empesa de ti, dospues kontinua kon la famiya, es praktikamente komo una reparasyon. Tenemos muncho menester en estos periodos, siempre tu sona la puerta, i tu da la mano; no te espantes, seguramente alguno te dara repuesta, asi empesan las ganansias. Nunka no te arrepientas de lo ke deshates atras, siempre mira a delantre, porke el empesijo bueno esta aya...
Mos toparemos en dias buenos...
