Era un diya de invyerno entezador, la djente al lado la soba estavan mirando de no salir a la kaye sin demenester.
Mi madre i yo koryendo de un shastre al otro, mos estavamos kayendo i alevantando en esta tempesta. La Boda ya era serka de un mez i medyo, i no teniyamos remedyo mas ke lavorar para ke se aga todo bueno i djusto. Biride aviya el Balo de graduasion, ke no lo izyeron en su tyempo. Eramos dos ijas en la klasa, siguro ke no era ora de Balo para mi, i estava kon regreto grande ke estava muy serka de la Boda.
Diyas pasaron; una tadre ke torni de la kaye, vide Mme Eliza asentada en la kyoshe komo syempre, la kavesa meneyando, murmureyando una kantika, i kontando el pasado. Mme Eliza era una personalidad spesial, i una oportunidad en el Apartamento i en la kaleja entera, la deshavamos en kaza para azer aranjamyentos, akurtar, alargar le viniya munchas kozas de la mano. Kuando la vide a Mme Eliza me enkanti; ora de Mme Eliza es? En estas oras apretadas, las ventanas medyas avyertas, medyas serradas, el perde travado, medyo avyerto me parese ke vide un montante de tul blosyel enriva la meza, ke afito? No kedi de demandar, mi madre me disho, desha todo i ven para la prova, me metyo el tul enriva la kavesa, vide un fostan de una kolor muy ermoza. Mas enkantada de punto en punto demandi la razon de este fostan de tul mavi. Me kontaron la istorya del tul de kuantos metros i de esta ermozura i kolor mavi de ande kitaron tanto tül? i me dyeron la prvovenensya de esta ropa, mi madre kon muncha seryozita apunto el dedo verso la ventana, i yo entendi toda la konseja, se kito los tules de los perdes, se boyadeyaron en blu en un kazan chiko (Palya) de kaza i se izo una ropa para fostan. Enriva de mi tomaron mezura i kon Mme Eliza endjuntos se kuzyo, i se adjusto una roza enriva de una sentur brodada ke alusho / ermozeyo el fostan.
Orozamente era serka de kaza, en el braso de mi novyo kon batires de korason entrimos a la Reunion. Todas estavan salidas del kuafor, vistidas de shastres renomados. I yo kon muncho orgulyo, kon el tul del kazan. En el entorno de mi no estavan muy diferentes, i kuando baylimos el fostan se estava bolando, i me toparon ke esto muy shik, no savyendo las oras ke pasimos a mirar si el blu esta igual en todos los lugares del fostan.
Era tyempos muy duros, ma de esta istorya orijinal mos kedo un suvenir, un rekuerdo de mi Boda.
I fue una vida oroza kon Amor i Entendimiento.
