Komo Yemen es un paiz fondamentalisto, i sin demokrasia, el puevlo de Yemen no tienen la uzansa de protestar kontra kualsikera kondision del governo. En la televizion, los Yemenis siempre meten komedias sovre palestinianos, burlandosen de bovos soldados israelianos.
Allado de este antisemitizmo, los yemenis diziyan ke eyos apresian muncho la erensia de los judios en sus paiz. En la grande mishkita en la vieja parte de San’a, los yemenis amostran a los turistos kon orgulio, las ekskavasiones en las paredes echas por los artistos judios, i el valorozo arte judio. En el kazal de Jibla, en el sur de San’a, los vilajieros les amostran la estreya de David en la vieja Sinagoga ke agora se transformo en una Mishkita. Los merkaderes de plata diziyan ke sus platas son de grande valor porke son platas de la ley judia. La polisiya permete a los amerikanos de vijitar los viejos kazales judios.
Ma mas, no ay kazales judios en Yemen, porke duspues de mas de mil anyos en este paiz, los dalkavos judios de Yemen salieron del paiz por entero. Sien anyos antes, 50.000 judios bivian en el paiz. La vida de los judios en Yemen se aviya echo mas difisil despues de la fondasion del estado judio en el anyo 1948. Despues de 1948, aktos de violensia kontra los judios empesaron a pujar. La majorita de los judios yemenis fueron salvados kon la Operasion del Tapet Majiko (Operation Magic Carpet), kumplido por Israel i por los Estados Unidos. En el anyo 1990, 1200 judios yemenis fueron fuyidos del paiz kon una segunda operasion. Despues ke los rebeldos Houthi pasaron al governo, el governo empeso a dezrepozar los judios mas muncho de antes. Sienes de judios fueron evakuados de San’a i embiyados a otros lugares.
Kuando las menasas empesaron a pujar, grupos de israelianos, de judios amerikanos, i de diplomates, penaron para estableser estos judios yemenis en los Estados Unidos i en el estado judio. La emigrasion de los judios dalkavo de Yemen fue un grande evento istoriko. Anyos antes, los judios de Yemen eran los solos judios arabos ke tenian la libertad de tener una identidad araba i tambien judia. En Beirut, en Damasko i en Bagdat, ande un tiempo egzistiyan las mas grandes komunidades judias, agora lo ke kedo es solo unos kuantos judios ayedados. Ma los judios de Yemen, por munchos anyos, pudieron prezervar sus Sinagogas i pudieron kontinuar a selebrar sus fiestas en estas Sinagogas kon grande liberdad. En el anyo 2024, aviya kedado solo un judyo ayedado en Yemen.
