Dos vezes mos fuimos a Bulgaria. Una vez kon treno a Sofya i sigunda vez a Burgas. Sofya es la kapital del paiz. Por 2 noches es una sivdad ermoza i enteresante. Puedesh ver en kaminando unas kozas de los Otomanos, un poko de kultura de los djudyos i naturalmente el modo de bivir de los Bulgaros. Ay iglesiyas de los Ortodoksos, muy importantes fraguas komo Sinagoga i Meshkita. La kaleja ke es serrada al trafiko Vitosha Boulevard, la statua de St. Sofia, la Katedral Aleksandr Nevski, la Universita i la guerta son para los turistos muy enteresante.
Otruna vez kijimos yevar al inyeto para vakansas i bushkimoz lugares i dimos karar para ir a Burgas ke es una sivdad en el bodre de la mar ande ay oteles para azer vakansas. Sunny Beach i Nessebar, el bodre de mar es 4 Kilometros de largor. Aki ay oteles de kada manera. Kon 3-4-5 estreyas en unos oteles ay Gazinos. Di ke parese komo Antalya. Las komidas ke son bufe avyerto, los Show’es todo perfekto. En el sentro de Sunny Beach ay restorantes, kafes, una kaleja ke es serrada al trafiko es una kaleja muy eglendjeliya. Ay un treniko de 4 vagones, aze tur de la sivdad, kaji 1 ora pasa el tiempo muy ermozo.
Kon otobus de la munisipalidad vos puedesh ir a Nessebar en 20 minutos. Aki es un kazal de Burgas, komo Sunny Beach. Tambien i aki ay oteles; es un lugar mas otantiko. Tiene Muraya, Mulino, ruinas istorikas. Aryento de la muraya ay botikas, kafes, i restorantes. En las botikas ay mas muncho objetos turistikos, komo Magnetes, kupas, vistimyentas folklorikas de Bulgaria, bluzas ande esta eskrito ensima Nessebar ets. En kaminando spesyalmente la noche kon las luzes ke esta chafteyando ensima de los sures i paredes, parese del siglo 18 la vista. Ay unos kuantos restorantes kon tarasas, la vista panoramika esta komo tablo. Si preferish azer vakansas aki, kreyevos vos kosta mas barato de lugares komo Bodrum, Çeşme i Antalya.
Si demandash la Gastronomiya es tipiko de los Balkanes. Los borekes, las koftes son muy savrozos. La salata Shopska parese komo Salata Grega de la Gresya. I eyos kullaneyan yogurt komo Tzaziki de los Gregos, lo yaman Tarator. Al kebap lo yaman Djevapi. El Musakka i las Dolmas es komo lo azen aki. El Kashkaval es pikante i es la savor maraviyoza.
Si vinimos al sujeto de la eskriturya ke es los Dulses, las dulsuryas tambiyen son komo los Balkanes i los dulses de Estanbol. Mekitsa, (Komo Pishio Bromvuelos) Revane (parese a Revani), Funiiki dulse de kyula komo Trdelnik de Chekya. En kaminado en las kayes vimos botikas ande estan vendyendo dulsuryas i diferentes patiserias. Entri para mirar ke ay ke no ay. Aviya Baklavas, Tulumbas, pastas, bishkochos ets. Puedeser porke estamos en la mizmo jeografia parese la Gastronomiya al de Estanbol.
