La Konferensia de Wannsee fue una reunyon de altos funksyonaryos del governo de la Almanya nazi i lideres de las Schutzstaffel (SS), selebrada en Wannsee, un suburbio de Berlin, el 20 de Enero de 1942. El objektivo de la konferensia, konvokada por el direktor de la Ofisina Prinsipal de Seguridad del Reich, el SS-Obergruppenführer, Reinhard Heydrich, era asegurar la kooperasyon de los dirijentes administrativos de diversos departamentos governemantales en la implementasyon de la “Solusyon Final a la Kestiyon Djudia”, en la kual la mayoriya de los Djudios de la Evropa okupada por la Almanya Nazi seriyan deportados a la Polonya okupada i finalmente asasinados. Entre los partisipantes de la konferensia se topavan reprezentantes de varios ministeryos governamentales, inkluyendo sekretarios de estado del Ministeryo de Eksteryor, de Justisya, del Interior i de los ministeryos de Estado, ansi ke reprezentantes de las SS. Durante la reunyon, Heydrich ekspliko komo los Djudios de la Evropa okupada seriyan detenidos i embiyados a los kampos de eksterminasyon en el “Governo Jeneral” (la parte okupada de Polonya), ande ivan a ser asasinados.
La diskrimasyon kontra los Djudios empeso imedyatamente despues de tomar el poder por los nazis el 30 de Enero de 1933. El rejim Nazi empleyo la viyolensa i la presyon ekonomika para konvenser los Djudios a abandonar el paiz voluntariamente. Despues la invazyon de Polonya en Septembre de 1939, empeso la eksterminasyon de los Djudios evropeos, primero empleyando eskuadrones de la muerte mobiles komo los Einsatzgruppen, i los asasinatos kontinuaron i akseleraron despues de la invazyon de la Union Sovietika en Junio de 1941. El 31 de Julio de 1941, Hermann Göring otorizo por eskrito a Heydrich a aparejar i prezentar un plan para una "solusyon total de la kestiyon Djudia" en los teritoryos debasho el kontrol de los Almanes i a koordinar la partisipasyon de todas las organizasyones governamentales implikadas. En la Konferensia de Wannsee, Heydrich ensistyo ke, una vez kompletado el proseso de deportasyon, el destino de los deportados se iva azer una problem interno debasho la juridiksyon de la SS. Un objektivo segundario era topar una definisyon de ken era Djudio.
Una kopya del Protokolo kon las aktas de la reunyon, ke fueron dados a los partisipantes, sovrebivyo la gerra. Fue topado por Robert Kempner en Marso de 1947 entre los archivos del Ministeryo de Eksterior alman. Se empleyo komo prova en las sedutas de Nuremberg. La Kaza Wannsee, sitio de la konferensia, es oy un monumento komemorativo del Olokosto.
