En pasadas fuimos a Valencia.
Mi ijo, ke ya tiene onze anyos, es auzado a komer de todo. Agora ya no aze problemes.
Ma mi ija… eya es otra istorya. No todo le plaze. Si la deshan, puede bivir dias enteros solo kon patatas i arroz.
Mi mujer se esforsa muncho para toparle komidas ke le va plazer. Si no se topa, la ija no kome, i una madre no se puede kedar trankila viendo esto.
Por koinsidensia, en un restaurante enkomendimos albondigas.
Mi ija en primero alevanto la nariz.
La salsa de domat no le plaze muncho.
Despues, kon muncho tino, kito las partes de domat ke se veyian, las alimpyio un poko kon una serviyeta, i gosto un pedaso, en primero kon espanto.
Despues otro.
Despues otro mas.
En poko tiempo, empeso a komerlas kon muncho gusto, komo si las konosia de toda la vida.
Desde este diya, kada vez ke entravamos a un restaurante, la kestyon era siempre la mizma:
— Ay albondigas?
Muestro anyo muevo paso albondigas en mano.
De restaurante en restaurante, de kaye en kaye, siempre en bushka de albondigas.
Kuando tornimos a Estambol, el nono Moris, ke le plaze gizar i no save bivir sin la kuzina, izo un kilo entero de albondigas para Shabat.
Mi ija se asento a la meza.
Komio una.
Despues otra.
Despues otra mas.
Al fin, kontimos: diez albondigas.
La alegria de la famiya era de ver.
No solo por las albondigas, si no por ver una kreatura komer kon gusto i una meza yena de riza.
A vezes, la felisidad entra a la kaza sin dar haber.
A vezes, entra en forma de una albondiga.
