Kuando meldo un artikolo sovre teatro, de vista lo kopyo a mis archivos. En turko ay una ekspresyon “akan sular durur”. Para mi si es tatro esta ekspresyon es muy valable.
En pasadas me fui a ver la pyesa de la vida de AFİFE JALE (la primera artista turka ke salyo a la shena). Durante todo la piesa, el nombre de Eliza Binemeciyan paso muncho, porke kuando Eliza se fue a Paris, malgrado akel tyempo, una mujer turka (muzulmana), era defendido de salir a la shena, la korajoza turka Afife Jale, kon el aksento ermeni fue kapache de djugar teatros. Agora veremos ken es ELIZA BINEMECIYAN.
ELIZA nasyo en Estanbol en el anyo 1890. Meldo en la Notre Dame de Sion de Kadıköy. Su padre i su madre eran artistos de teatro de sorte ke Eliza se engrandesyo en los kulises de teatro. Kuando teniya 10 anyos, empeso a salir a la shena en rolos de kriaturas, ayi amostro su talento i tomo rolos prensipales en la kumpanya Mınakyan.
Su karyera profesyonal empeso en el anyo 1908 a los 18 anyos en una ovra de mansevos nombrada,“Serbest Sahne”. Las piesas eran en lingua armenya, tanto fue reushida, un poko dospues paso a Mınakyan i tomo el titro de
“la mas famoza artista de teatro”.
De vez en kuando djugo en munchas shenas, komo Donanma Cemiyeti Temsiliyesi, komo Yeni sahne ma el periodo mas briyante de su vida fue kuando entro al Darülbedayi (oy Muhsin Ertuğrul tiyatrosu).
En 1921 se kazo i se fue a Paris.
Un diya tomo una invitasyon de Raşid Rıza (1926) i vino a Estanbol, partisipo en munchos djugos en el Teatro Fransez i torno a Fransya por entero.
Eliza Binemaciyan, kuando empeso a lavorar en el Darulbedayi, los otros artistos en tomando 5 u 7 liras, eya tomava 12 liras al mez. Eya fue renomada i fue una estreya del teatro Turko.
Malgrado ke era Ermeniya, komo tomo lisyones de literatura Turka, avlava el Turko a la perfeksyon kon aksento muy puro. Esta kalidad le izo ganar mas muncha fama. No era muy ermoza ma era elegante i ezvelta. Malgrado ke era shashuta, nunka se viya porke en la shena syempre se estava de profil i dingunos remarkavan ke era shashuta.
En una revista del anyo 1948, paso su mombre kon alavasyones i dizyendo ke fue una artista de teatro muy presyoza.
En sus diyas de alkavo mando una letra a Estanbol dizyendo a sus amigos vyejos de la shena:
“Esto muy gloryoza i kontente de oyir ke el teatro turko se esta ennaltesyendo de diya en diya, tengo un grande eskarinyo por mi patriya ande nasi, tengo syempre en mis ojos el famozo Estanbol, tengo eskarinyo de los lugares ande kamini en mi manseves, de Taksim, de Pera, del teatro, de mis kolegas.
Esto muy oroza de sintir ke no vos olvidatesh de mi i yo mezmo no me olvidi nunka de vozos. Puedeser ke un diya me ayega el Dyo de vijitarvos, saludes a todos los ke demandan por mi... ELIZA”
Eliza Binemeciyan muryo en el anyo 1981 en Kanada.
Ke su alma repoze en pas.
