En Israel ay munchos lugares ke son muy santos i munchos turistos van kada anyo a vijitar estos lugares. Unos vijitan estos lugares i despues kontinuan a bivir sus vidas. Ma ay unos ke sufren de “Sendrom Yerushalayim”. El turisto despues ke vijita la sivdad santa, le viene un shok relijiozo. El tanbien se siente santo i entra en un trans relijiozo.
Estos turistos son lo mas muy relijiozos i kuando entran a estas sivdades, salen lokos. Se kreyen ke son mashiah o profetas. Otros oyen bozes de los Santos o de los andjeles ke vienen de los sielos. Algunos kreyen ke el Dio les avla o kreyen ke deven de gerreyar kon el diavlo, i otros se kreen ke son eroes de la Biblia komo el Rey David o el Profeta Eliyahu Anavi.
Los gides turistikos de Yerushalayim ya se apersiven kuando alguno esta ampesando a pedrer la kavesa. Al anyo se ve unos 150 kavzos de este tipo i unos 50 turistos eskapan en un ospital psikiatriko.
Esto no es una hazinura mueva. El Dr. Heinz Hermann, del ospital psikiatriko judio, eskrivio sovre este sendrom en 1937 ma dize ke esto data desde munchos siglos.
En sus livros sovre Yerushalayim, los psikiatres, Eliezer Witstom i Moshe Kalyan eskrivieron ke ay ombres i mujeres ke vinieron de todas las partes del mundo ke se azen lokos. Porke la relijyon okupa toda sus vidas. El profesor Wistom konta ke un diya resivio una karta de un turisto ke estava siguro ke el era Mashiah. El profesor ekspliko: “Komo en muestra vida tenemos personas muy emportantes, tanbien tenemos i lugares muy emportantes. Kuando vijitamos estos lugares emportantes, muestros sintimientos se ajitan”. Los psikiatres Wistom i Klein no kreyen ke este sendrom es una hazinura psikiatrika. Eyos kreyen ke esto es una koza kultural-relijioza-mistika.
La istorya la mas famoza del Sendrom de Yerushalayim es el kavzo del australiano, Michael Rohan. En 1969, el mansevo kristiano kijo kemar el Templo de Al-Aksa en Yerushalayim. Ekspliko ke keriya ayudar a la vinida del Mashiah. Penso ke si kemava Al-Aksa, los judios ivan a konstruir el Templo Beit Amikdash. Siguro ke todo el mundo muzulmano estava muy inyervozo. Si Rohan reushia en su plano, puediya salir una gerra. El tribunal dyo karar ke este mansevo de 35 anyos tiene problemes mentales i lo metyeron en un ospital psikiatriko.
Oy en diya los psikiatres kreyen ke la mayoriya de los hazinos kon este sendrom tienen una hazinura mental de anyos antes. Estos turistos kuando vienen a esta sivdad emportante, pensan ke van a topar una sivdad kalma i santa komo en el tiempo del Tanah. Ma topan una sivdad moderna kon otomobiles, bruido, muncha djente i munchas relijiones. La diferensya entre lo ke pensavan i lo ke topan, puede ser la kavza de este sendrom mistiko. Los doktores konsejan a sus hazinos, ke tornen a sus sivdades para ke el problem desapareska.
