Salatim Hamim en ebreo kere dizir salatas kayentes.
Anyos antes, antes de la pandemiya, mos fuimos a viyajar a Israel. Mos fuimos siguro a vijitar a mi prima Sara ke mora en Hayfa Ahuza. Despues ke mos asentimos, bevimos un kafiko kon un moabet presiozo, dishimos saliremos un poko a ver el entorno. Estava un panorama maraviyoz. Arvoles altos altos, todo vedre, muy ermozo. Verso medyo diya Sara disho vos va yevar a un lugar para komer por midi. Un lugar kon komidas ermozas. Mos fuimos al restorante Pesto. Ya vos va dizir deke no me olvidi el nombre de este restorante.
Mos asentimos, vino la ijika a darmos el menu. El menu estava en dos linguas, ebreo i inglez. Ampesi a mirar lo ke ay. Ke veyo? Un paragrafo kon titulo “Salatim Hamim”. Atyo salatas kayentes? Dishimos ok. Eskojimos una salata. Veremos lo ke es? Komo es salata kayente?
Vino un plato de salata muy grande. Dos o tres personas puediyan komer de aya. Vedruras diferentes, kon domatikas chikas, azitunas, mais, i mas munchas kozas ke no me akodro mas. I ensima yeno de revanadas de avokado. Kon una sos vedre. El chini i la salata estavan kayentes. Ma la salata no estava kocha. Simplemente kayente. Ampesimos a komer kon kuryozita i ezitasyon. Estava muy muy savroza. Si pasash por aya i si este restorante dainda egziste, vos konsejo de enkomendar esta salata.
Este evenimyento me izo akodrar un rekuerdo de mi chikes.
En la eskola primera, Birinci Karma, mos yevavamos un sestiko de komida para midi. Mi mama me metiya un taponiko para meter ensima la meza debasho el sefertasi, dos o tres sefertasis kon komidas ke mos plaze, una fruta i un torshon enshavonado para ke mos alimpyemos la kara i las manos despues de komer. Estos sestikos los metiyamos en un lugar del salon ande komiyamos i mos ivamos a las klasas.
Agora, en la eskola teniyamos una madam Ester, de bendicha memorya. Una mujer muy muy kapachi. Madam Ester serka de medyo diya avriya todos los sestikos i metiya todos los sefertasis a kayentar, para ke mozotros los ijikos/ijikas toparamos las komidas kayentes. No es kolay, de kayentar tantos sefertasis enduna. Akel tiempo la eskola era muy yena de elevos.
Ya sono la klosh, ya me iva a la sala de komer kon una ambre de lovos. Yo ke avro el sefertasi, ke veyo? Salata kayente, buyendo. Meoyo kayente buyendo. Siguro Madam Ester no puediya avrir unos a unos tantos sefertasis para mirar lo ke aviya aryento. Komi la salata kocha, ke azer? Tengo ambre. Mi mama me metiya en vezes pishkado salado ke ya saviya ke me plaze muncho. Abasta ke koma yo, porke era muy flaka. I akeyo kocho.
Kero dizir, lo ke no me plaziya del todo en lo ke era yo chika, me namori kuando me engrandesi. Salata kayente!
