Kuando mos fuimos al Leshano Oriente, vijitimos 3 paizes, Tayland, Malezya i Singapur. Orijinalmente el buto era Bangkok. Kuando me vo ansina a lugares leshos, kreyo okazyon para ir a unos kuantos otros paizes. Por egzempyo, kuando mos fuimos a Sud Amerika a Argentina izimos el program para Brasil i Uruguay. Ansina izimos el program del Leshano Oriente. Kuando arivimos a Bangkok empesimos a kaminar en primero la sivdad panoramika. Vinimos al palasyo The Grand Palace, la guerta, la arkitektura, las kolores, las statuas, kedimos enkantados. Komo de rikeza. Despues del palasyo vinimos a los templos Wat Pho i Wat Phra Kaev; las guertas de estos templos estavan muy grandes i muy ermozas i dekorativas. Aki vimos modos i maneras de statuas del Buda. Buda asentado, Buda echado, Buda kon diamantes, ets. Los Budistos estavan orasyonando. Estavan entrando a los templos sin kalsados, i se estavan asentando ensima de los dizes. I yo merakli turshudju entri para mirar. De aki mos trusheron al bodre del Rio i kon barkas largas i estrechas asentados en basho izimos el tur del rio i pasimos del templo Wat Arun. Era las oras ke estava el sol en el kashko, las luzes estavan chapteyando ensima del templo; di ke aviya fuego. Este karar de luzyor se estava viendo. Despues vinimos a la guerta ke se yama Flower Market. A la noche mos yevaron a un bazar muy grande. Se yamava Pat Pong. Todo modo de koza se podiya topar falso. Todo markas de vistimyentas, de oras, de chantas ets. Tambiyen en esta kaleja aviya bares i kazas de masajes i striptiz. Estava komo la kaleja de Amsterdam Red Light Street.
Al otro diya mos yevaron a un bazar ke se yama Floating market. Aki aviya sandalas ande estavan vendiyendo kozas, komo ropas, djugetes i frutas tambiyen zarzavates. La djente del paiz estavan merkando kozas komo ke estan en un bazar avyerto. En Bangkok mas muncho de Taksi ay Tuk Tuk. Esto es una motosikleta ke tiene detras lugar para asentar, i vos yeva komo taksi ande keresh.
Despues de midi mos fuimos kon una Barka grande para azer el tur del Rio Chao Praya. Izimos un keyf maraviyozo. Mos enkontraron kon las vistimyentas folklorikas, mos asentimos en los lados de la barka. En mediyo aviya una meza yena de frutas tropikales, i dulsuryas. Despues ke izyeron los bayles i kantikas folklorikas, pasimos allado de la meza para komer las frutas i dulsuryas. Si demandash kualo aviya en la meza de enteresante, en primero las frutas tropikales ke se topan ayi komo ananas, mango, papaya, kivi i banana; aviya mas de esto, spesyales del Leshano Oriente, Dragon Fruit, Rambutan, Durian estavan en la meza komo un tablo Naturmort. Las savores estavan una lokura. Si demandash los dulses Tong Yip, Tong Yord, Foi Ton i Khao Niao Mamuang. Era un dulse ke se apareja kon arroz, i se ata kon leche de coco. Ensima de las ojas de banana i al lado gajos de mango. No me arti de komer. Me iva komer i los dedos.
