Aviya un haham, i estava bivyendo kon el ijo. El ijo teniya kaji 18 anyos. Kuando vino enverano i se serraron las eskolas, le disho al padre, ya me ize grande, kero bivir 2-3 mezes aparte i kero ambezarme la vida, komo se bive solo. Por esto me kero ir a otra sivdad, si me permetes, i kero un montante de paras para komer, para bivir. I el padre se penso, se penso de si para si, i disho para ambezar la valor de la vida esta buena idea, tyene razon, i ya se izo grande. I le dyo repuesta al ijo, si ya te puedes ir, i te va dar paras para mantenerte, i kuando se te eskapa, me das haber, te embiyo de la banka. Ma solo kon una kondisyon, aryento de esta chantika ay un tefilin, me vas a prometer ke kada demanyana te lo vas a meter. I el ijo le disho al padre, te prometo ke kada demanyana me va meter el tefilin. I dospues de 2-3 dias, se fue a otra sivdad. Paso un mez, un telefon del ijo, ke haber papa komo estas, las paras me kedo poko, me puedes embiyar? Si, le disho el padre, amanyana de la banka te embiyo, te estas metyendo el tefilin kada demanyana? Si papa, le disho, kada dia sin olvidar. Paso una semana otrun telefon vino del ijo, papa no vino las paras, no me embiyates. Komo no, le disho el padre agora va demandar a la banka, tu te estas metyendo el tefilin? Si papa, kada dia, sin olvidar. Este modo en 3-4 dias estava vinyendo un telefon ke las paras no vino, i el padre le estava demandando, el tefilim te estas metyendo. I achakes ke paso dainda un mez i medyo un dia sono la puerta, i el haham avyo la puerta; ke ve? El ijo ke vino. Dainda no se izo 3 mezes, deke vinites? le demando.
Me kedi sin paras i tu no me mandates, por esto vine presto. Deke no te metites el tefilin kada diya? le disho el padre. Komo no, sin olvidar kada dia me lo meti. Avre la chantika del tefilin, le disho el padre. Kuando avryo la chantika ke ve aryento ay un montante de paras! Kon la verguensa no le pudo mirar a la kara del padre. Si te metiyas el tefilin, tenias menester de avrir la chantika, i ya las ivas a ver las paras, no me ivas avrir el telefon...
Una vez si te aferrates kon mentira, no puedes mas konvertir la verdad mil vezes.
Un abraso grande, i anyada buena kon sanedad, kon pas, i kon todos endjuntos.
