A los paizes de Media Evropa, Hungariya, Slovakya, Chekya i Austria me plaze irme. A estos paizes me fui unas kuantos vezes. Paresen el uno al otro. Los arkitektos, la kultura, las komidas. Vos kontare. El kapital de Hungariya es BudaPest. De en medyo de la sivdad pasa el rio Danube. Una parte es Buda, la otra parte se yama Pest. Ensima del rio ay 8 kyupris. Los mas mostrozos son, Margaret, Liberty, Elisabeth i The Chain. En la parte de Pest se topa la kaza del Parlamento, ke en las kartpostales se ve lo mas. La Sinagoga la mas grande de Evropa, Dahony esta en Peste. La kaza de la Opera i la kaleja de ande no pasan arabas i ke es serrado al trafiko, Vati esta en Peste. Por lado de Budin ay la Kula de los Balukchis, la montanya Gellert, la Muraya de Budin, la Katedral Matthias. Esta sivdad se konose por los Banyos Termales. Por la parte de Budin ay mas munchos de estos Banyos Termales. La Turbe de Gul Baba es topa aki. Kon otobus es kaji 1 ora de kamino para ir a la muraya de Estergon. Esta muraya es muy importante por los Turkos. En 1543 estava en la mano de los Otomanos. En kaminando gostimos unas kuantas savores komo el Vino Tokai, la komida Gulash i el Trdelnik.
A Slovakya mos fuimos kon vapor de Rio. Era un tur del rio Danube i aki ugradeimos. Bratislava es la kapital de Slovakya. Es una sivdad muy chika ama muy sempatika. La sivdad entera la puedesh kaminar a pye. Kuando abashimos del vapor el Gia mos yevo a la Muraya de Bratislava. Despues vinimos a la sivdad vieja de Bratislava. Vimos el palasyo del Prezidente, el Teatro Nasyonal, la kaleja ande se topa la statua del Schone Naci i a la kaleja ande se topa el lavorante de lagum, Cumil. La estatua de Cumil es muy sempatika. Kada uno mos travimos fotos kon esta statua. Despues vinimos a una plasa ke de aki en kaminando mos fuimos a Michael’s Gate. En el kamino gostimos Vino kayente, la almendra spesyal de Bratislava i Trdelnik.
El mas Shik de estos paizes es Austria, i la sivdad Viena. En kaminando vos sentish parte de la grande dinastia de Habsburg. De los palasyos, de las Katedrales, de la arkitektura, mizmo tambiyen de la djentes ke vesh en las kayes son muy shik i un poko diferentes. Si demandash ande mos fuimos en Viena, puedo empesar de la Katedral St. Stefan, despues, los palasyos Schönbrunn, Hofburg i Belvedere. La kaza de Opera, la kaye ke es serrada al trafiko Graben, la kasa de Munisipalidad, la kaza del Parlamento, otra kasa muy enteresante ke se yama Hundertwasser. Si vinimos a la Gastronomiya no ay ke dizir para el Shnitzel. Tambyen i aki se kome el dulse Trdelnik.
Prag es la mas Turistika sivdad. Los lugares son para kaminar: El kyupri Karl, La Katedral Vitus, La Muraya de Prag, La ora Astronomika, El Muzeo Nasional, El Muzeo de Kafka, La Maale Antigua de los Djudyos, El Monte de Vysehrad. Komo todos los paizes de la Media Evropa i aki el Trdelnik se vende en las patiserias i en las kayes.
