La perasha Re’e eskrive: Vas a dar, i tu korason no se va amargar kuando das.
Mi padre “dbm” mos diziya ke kale dar sedaka, de alma i de korason. Kale dar a ken demanda. Porke demandar no es fasil. Sovre todo en el tiempo de la gerra, ke aviyan kedado munchas bivdas kon kriyaturikas, aviya famiyas ke se topavan en muncha difikultad. Por egzemplo, antes aziyamos las kaparas ande los gayneros. Aya se eskojiya un gayo, se pasava por ensima de la kavesa kon orasyones i despues se kortava, se esplumava i la davan al ken izo la kapara. Este gayo no se yevava a kaza, se dava a los menesterozos. Mi mama diziya: “Ansina solo el gayo no se da, se da tambien unas paras endjuntos. Porke puede ser ke el menesterozo no tiene bastante paras para asender una lumbre”. Ya vos dishe en akeyos tiempos aviya muncha provedad. Kero dizir ke kuando se da un dono o una sedaka kale ke lo demos kon plazer. Aze tu echo komo se deve.
En una sivdad grande iva aver un balo muy emportante. Todas las famiyas rikas i nobles estavan envitados. Este balo era dado al profito de una organizasyon de ayudo.
Madam Fulana, ya teniya el fostan pronto. Ya lo aviya aparejado de muncho antes. Ma no estava topando un par de eskularichas ke vayga kon este fostan. Kamino kalejas, magazenes i a la fin ya topo unas eskularichas ke se namoro. I las merko buen karar de karas. Estava muy muy alegre.
Ya vino akeya noche, el kupl, vistidos de fiesta arivaron kon una limuzin delantre del otel ande se iva azer el balo.
Se dirijaron verso el asensor i pizaron al boton i suvyeron al kat 78, ande se iva pasar toda la noche.
Entraron al salon ke estava briyando debasho de las lampas de kristal, rozas por todas las partes. Toda la djente rika estavan avlando i bevyendo kon kupas en la mano. Un poko despues eya disho ke estava muncha kalor i le disho a su marido ke keriya salir al balkon. Kuando salieron al balkon, un ayre fuerte se yevo una eskularicha i la echo abasho a la kaleja.
La mujer en primero se espanto, ma un segundo despues echo i la otra eskularicha tanbien ande kayo la primera.
“Ke estas azyendo?” demando el marido kon espanto.
Eya respondiyo “El ke lo va topar, va tener ansina un par entero. Yo ke va azer aki kon una sola eskularicha. Al menos, el otro ke lo goze”.
Eya se inspireriya de esta perasha?
