“Esto orgulyozo de ser judio, i es por esta razon el antisemitizmo ke esta pujando de diya en diya me da merikiya” esta dizyendo Steven Spielberg.
Anyos antes, en los diyas del filmo ‘La lista de Schindler’, Spielberg avlo aviertamente sovre sus raizes judias i sovre sus esperansas para sus ijos. Kuando era chiko, la famiya Spielberg bivyeron en California. Eyos eran la sola famiya judia del vizindado. "Ya saviya siempre ke yo atirava la atansion por mi judaizmo”, se esta akodrando Spielberg. “En la eskola segundaria me aharvavan. Viniya a kaza kon la nariz ariento de sangre. Era orivle”.
Los Spielbergs avian pedrido parte de sus famiya en el Olokosto, teniyan parientes ke fueron asasinados en Polonya i Ukranya. A la edad de 46 anyos, Spielberg dio un paso korajozo filmando el filmo ‘La Lista de Schindler’. En estos dias, Steven era el padre de sinko kreaturas i el keriya ke fueran engrandesidos kon una fuerte identidad judia.
“Kuando mis ijos nasieron, me desidi ke devian de resivir la edukasion judia”. Su segunda mujer, Kate Capshaw, se konvertio al judaizmo. Spielberg metyo mezuzas en las puertas de su kaza. Spielberg konstruyo una kozina kasher en su kaza de Los Angeles, ande su madre gizava las komidas de las fiestas judias.
Steven se esta akodrando komo su madre le avlava del Olokosto kuando era una kreatura. "El Olokosto siempre fue parte de mi vida". Las noches, oras de komer su madre i su padre avlavan del Olokosto. "Peryimos primos, tias, tios”.
Oy, Spielberg tiene siete ijos i tres inyetos, i esta diziendo ke "filmar ‘La lista de Schindler’ fue el punto kuando konfirmi mi judaizmo a mi famiya i a mi mizmo”. Fue en este momento ke la famiya Spielberg empeso a obzervar todas las fiestas judias i asender las kandelas de Shabat, la noche de viernes. Selebraron bar i bat mitzvot de sus ijos. Spielberg los engrandesio kon amor por Israel i una fuerte koneksion a sus raizes judias.
Spielberg konto su apoyo a Israel i su dedikasion a kontinuar la edukasion del Olokosto. "La egzistensia de Israel para muestra sovrevivensia es inevitavle. Solo en sinko estados estan ovligando la edukasion del Olokosto en sus eskolas. Yo va kontinuar a lavorar para ke los programes de edukasion sovre el Olokosto seyan ovligatorios en los 50 estados, i tambien los programes de edukasion sovre la toleransia seygan ovligatorios para graduar de la eskola segundaria”.
Spielberg establesio un archivo de videos en la Universidad Ebrea kon miles de oras de entrevistas kon sovrebivientes, yamado Proyekto testimonial del Olokosto.
