Ya pasimos otrun anyo kon gerras, hazinuras, matansinas, terremotos, tsunamis en el mundo entero.
La anksyedad por el futuro espanto a las personas i estan muy pesimistas.
Agora estamos arogando por el anyo muevo solamente muestra sanedad, muestro repozo i la segurita materyal i moral. El Dyo Poderozo ke no mos aga bushkar el dia ke estamos bivyendo oy. Oyeremos haberes buenos del entorno.
Separasyones inesperadas, eventos inoportunes, lo ke keriamos azer ma no pudimos, eksperyensas difisiles, un mundo roto, ravyas entre las personas, evenementos interminables…
Estamos deshando atras un anyo entero. Komo va ser el anyo 2026? Todos estan asperando kon kuryozita.
En los anyos presedentes aviya un entuzyazmo, illuzyones, una lista de dezeos. Kualo azeremos, ande mos iremos, planes, kualo mos vistiremos… ke regalos merkaremos a los keridos?
Sovre todo aviya una esperansa. Un poko de pasensya…
No peryer muestra esperansa…
El anyo pasado mos ambezo ke una riza, una byenfezensya azen un mundo mas fasil para bivir.
El anyo muevo mos ofrese una oportunidad. Biviremos mas simple, no koryeremos a todo, no mos kitaremos la alma para abasteser a todo, biviremos el momento mizmo i mos gozaremos de lo ke tenemos.
El dia del anyo muevo es un festival ke se selebra en la grande partida del mundo el 31 disiembre.
Las kayes de las sivdades grandes se illuminan kon las luzes…Es un momento endikado de reunirse kon los keridos, amigos, kompanyeros del echo para selebrar el amor, la amista i ogurar la sanedad i parnasa tova.
La esperansa es el derecho de todos, es la motivasyon de la vida.
Lo ke keremos, lo ke suetamos para el anyo 2026, lo mas emportante es la estabilidad del pais, en todo modo de punta de vista…
Esto ogurando ke el anyo 2026 mos trayga la sanedad, la felisidad, el kalmo, la unyon, la solidarita i la pas en el mundo entero….
