Los ke me konosen ya saven ke me plaze irme a la Gresya i a las izlas Gregas. La mar, la lingua, la muzika, la boz del Buzuki, el bayle Sirtaki, las Tavernas, las komidas, el raki ke se yama Uzo; kurto me dezmayo irme a la Gresya. Fin agora me fui a Thesaloniki, Halkidiki i Atina, a las izlas Thassos, Chios, Lesvos, Samos, Mykonos, Santorini i Creta. Kada una izla es diferente. Ma la djente es muy kayente, todos azen siesta, a todos les plaze azer keyf, no vesh ke estan koryendo; todo modo de echo azen repozado. A todos les plaze komer i bever, kantar i baylar. En unas kuantas izlas ay trasas de Otomanos. Komo hamam i Meshkitas. La agua de las plajes es komo vidro. Las komidas paresen a muestra Gastronomiya. Por egzempio, la Salata Grega es komo la salata Choban muestra. El Tzaziki, parese al djadjik muestro ma mas espeso. La tarama es la mizma, no tiene una diferensya. Saganaki es komo el kezo pane muestro. La dolma, la musakka ets. Gyros es komo el Doner muestro, solo ensima meten yogurt i patatas fritas, lo azen sandvich kon pita. Souvlaki es komo sish kebap. Galaktoboureko es un modo de borek. Se apareja kon kezo, ispinaka, sarsicha; el mas diferente es el ke se apareja kon krema, parese komo Laz boregi. Tambiyen Diples es komo borek. El materyal es masa ke se apareja kon arina. Se avre muy delgado aryento se mete muez i kanela molinada i se friye; despues se echa ensima asukar de pudra. Kourabiedes son bishkochos. El mas ermozo i savrozo es el ke se yama Bishkocko de Kavala.
Si demandash ke azesh en las izlas, las demanyanas despues del dezayuno mos vamos a las murayas de la izla, unas kuantas Iglesyas, a kazales diferentes. Fina midi azemos un tur kultural. Despues mos vamos a la mar. Kada diya diferentes plajes. En kada plaj ay chadir i shezlongez. Si komes i beves en el restorante de la plaj no te toman paras para la shezlong. En los restorantes se topa salatas, pizzas, makarones, unos kuantos mezelikes komo Tzaziki ets. Mos kedamos fina las 6; despues tornamos al otel, mos azemos dush, un poko deskansar i despues salimos para komer por la noche. Mos vamos a un Taverna si es entre semana; solo komemos, si es fin de semana ay muzika en las Tavernas. El divertimyento no vos puedo kontar, kale bivir. Es keyf grande. No ay persona ke no kedo kontente.
Si vinimos al sujeto de la eskriturya ke es los dulses ke komi en los diferentes paizes, en Gresya en kada patiseria puedesh topar Melomakarona. Parese komo el “Kalburabastı” o sino “Shekerpare” de mozotros. Tambiyen en las tavernas despues de komer te pueden trayer a la meza. I no vos toman paras por este servisyo. Una mar maraviyoza, las komidas de tomar el meoyo, la distraksyon fina la demanyana. Mas ke va bushkar para azer vakansas.
