En el siglo XIX, Simon Guggenheim tenia a su mujer hazina i no puedia lavorar. Despues ke su mujer murio, el kedo prove i kon un ijo. Era una epoka difisil i el puevlo no tenia de komer. El ijo Meyer, a la salida de la eskola, lavorava para vender artikulos de puerta a puerta i ganar un poko de paras. Eyos bivian en Argovia, un kanton de la Suisa.
Despues de sierto tiempo, Simon Guggenheim se kijo kazar kon una bivda, Rachel Weil ke tenia sinko ijas de su primer kazamiento. Las otoritas kristianas le defendieron de kazarse porke era bastante prove i no puedia mantener a la famiya. Ma Rachel i Simon estavan desidados de kazar i emigraron a los Estados Unidos, ande no avia restriksyones, kon Meir, el ijo de Simon i las ijas de Rachel. La Suisa estava ayudando a la djente prove a partir, para salvarse de estos proves i komo rezultado miles de personas abandonaron este payiz.
A la vinida a los Estados Unidos, Simon i Rachel se kazaron i de mizmo Meir, el ijo de Simon kon la ija de Rachel, Barbara. Meir empeso a lavorar, el mizmo lavoro ke azia en la Suisa, vendedor de puerta a puerta. Kon tiempo, marido i mujer avrieron un magazen ande vendian lo ke topavan. Entremientres la famiya kresio; tuvieron diez ijos, entre eyos Salamon en 1861. La famiya empeso a produsir diferentes produktos i a importar produktos de su patria. El kapital de los Guggenheim se estava engrandesiendo. Meir merko aksyones de una mina de plata i plomo en Meksiko, de 5000 dolares, ke en poko tiempo se izieron komo 15 miliones de dolares de oy.
A la fin del siglo XIX, los Guggenheim, komo los Rockefeller i los Vanderbilt eran una de las tres famiyas las mas rikas de los Estados Unidos. Eyos avian venido de un kanton agrikolo de la Suisa i kon sus ideas i lavoro eskrivieron una istoria de progreso.
Kon este kapital grande, Salamon Guggenheim, empeso a azer el komersio del arte. En su koleksyon avia todos los artistos de su tiempo komo Kandinsky, Picasso, Cezanne, Dali, Mondrian, Renoir, Van Gogh i Pollock.
Asi la famiya fue konosida por su eksepsyonal koleksyon de arte i sus famozos muzeos. Estos muzeos son administrados por la Fundasyon Solomon Guggenheim, fundada 1937. El primer muzeo fue el de Nueva York, konstruido en 1939 por el arkitekto Frank Lloyd Wright, nombrado Muzeo Solomon Guggenheim. En Venezia, desde 1951, fue ekspozada “La Koleksyon Peggy Guggenheim”, su koleksyon privada. En 1997, el muzeo de Bilbao fue konstruido en una superfisia de 24.000m2, por el arkitekto Frank Gehry, i miliones de turistos vinieron a vijitar el muzeo i arebivieron esta sivda prove i su deredor.
El ultimo muzeo Guggenheim se esta konstruyendo en una superfisia de 42.000 m2 en Abu Dhabi kon la sinyatura del famozo arkitekto Frank Gehry ke murio el 5 de disiembre 2025, a 96 anyos. Este muzeo va ser el mas grande de los muzeos Guggenheim i su aviertura esta programado en 2026.
La istoria de muestro puevlo es yena de istorias de progresos inkreivles. La perseverensia, el lavoro, la imajinasyon puede trokar la vida de una famiya, de una nasyon. Kontinuaremos a ser luz para los puevlos del mundo. HANUKA ALEGRE!
