Kuando mos fuimos a Maroko, en primero abashimos a Kazablanka, 1 noche i 2 diyas mos kedimos ayi. Despues mos fuimos por 3 noches a Marakhesh i a Suvayr. Malorozamente no teniyamos muncho tiempo, si no ya keriya irme a otras sivdades komo Fes, Rabat, Safsafan, i Tanca. Kuando estavamos kaminando en las kayes, en el charshi, en los hanes, di ke estavamos aryento del filmo “La Lampa de Aladdin”. La arkitektura, las botikas ande estavan enkolgadas las vistimyentas afuera, las vistimyentas de la djente, las golores de espesyas de las kayes, los karniseros ke teniyan las karnes enkolgadas en las kayes, los sedakeros ets. El viyaje mos estava pasando komo un suenyo. Los Berberis i los Arabos del paiz estan bivyendo endjuntos. Al Rey ke esta en la administrasyon, lo keren muncho. Antes de irme ize bushkidas. Aviya Sinagoga en Marakesh. Mos fuimos i pasimos una noche de Sukot. La Suka i el Ritual de Sukot estava muy enteresante. La djente estan avlando 2 linguas. En Arabo i en Fransez. Los palmyes ke aviya en el kamino mos estavan akodrando del dizyerto. Maroko tiene 2 bodres de mar. La una es el Mediteraneo i la otra el Oseano Atlantiko. Por esto tiene munchas komidas de peshkado. La komida spesyal es el Tajin. Se apareja kon kuskus i ensima si keresh kon zarzavat o si no kon karne. Una noche mos fuimos a un Restorante muy muy grande, kaji komo un stadyum de futbol. En una parte aviya salones de komer, en la otra parte un kampo komo stadyum ande mos izyeron show i mos amostraron la kultura de Maroko. En la komida aviya tambiyen i muzika. Mos dieron spesyales del paiz. Komo Tajin ets. Si vinimos al sujeto de la eskriturya ke es las dulsuryas ke komimos en los paizes ande mos fuimos, a la fin de la komida mos trusheron un dulse ke se yama Sellou. Es un dulse spesyal de Maroko. Se apareja en sofriendo la arina, manteka, miel, almendra i susam. Mas de esto se mete diferentes espesyas komo kanela, ets. Mos kontaron ke este dulse se kome en Ramadan. Aparejaron i un chini, en medyo metyeron Sellou en el deredor, baklavas, kadayifes i unos kuantos modos de biskochos, komo Chebakia, Feqqas, Qrecchiette, Makrout. I allado chay de menta. Todo estava bueno ama el Sellou paresiya komo el dulse de semola, ke se yama en Turko İrmik helvası.
