En aserkando de la fyesta de luzes i alegriya, me akodri de un rekuerdo del pasado traji-komik, kon muestro grupo ke no se olvida nunka, es komo una konseja.
Era unos diyas de Hanuka, estavamos el grupo entero envitados por un dezayuno ofisial, en la kaza del Konsul. Diyas mos aparejimos lo ke mos vamos a vistir, pantalon shik u fostan de boda. El diya del kombite una amiga mos yamo a su kaza para ir endjuntos, siendo ke morava serka del Konsul. Mos arekojimos todas aya, mos mirimos unas las otras por ver si estamos luzias, i sigun la ora djusta mos ampesimos a entrar dos amigas al asansor, en supito oyimos un bruido ke mos izo abrasar una a la otra, i el asansor kedo entre el segundo i el treser etaj. Ampesimos a gritar al portero, dinguno no respondyo porke estava en el ospital. No aviya ken ayudara. Las otras kompanyeras abasharon a piezes en gritando a darmos koraje, i de no peryer esperansa syendo ke es diya de Hanuka, diyas de miraklos. Afuera estava vidro, ma mozotros las dos amigas del asansor estavamos aryento la agua, ya mos kitimos el palto de furur i los kalsados pointu, el makyaj ya se troko de kolor, los kaveyos en dezordo. En supito se avyo la puerta, un mansevo entro, todos chafteyan palmas, Bendicho el Kriyador mos va salvar de este asansor maldicho i de estas oras de fiel. Se ampeso a mezurar la distansya entre la puerta i el asansor i se desido de meter una siya altika para azer esta operasion, kitimos los kalsados, desnudar las fustas si son muy estrechas. Medyas yorando medyas chapeteyadas izimos lo ke mos ordenaron. Titredeyando kon batimyentos, mos travaron una de detras de otra, de las pachas, i metimos los piezes a tierra. Una ful de djente kon palmas, kon kolonyas, kon eksklamasiones mos arisivyeron.
Enfin kon chapetas i hal de lokas, fuimos al pranso ofisial. Un regalo chiko yo lo prezenti kon seremoniya al Konsul. La ora ya estava bien tadre, ora de tornar a kaza.
Kada Hanuka mos akodramos de este diya uniko riyendo i un poko yorando.
Las amigas se apuran
Las dolores pujan
Rekuerdos del pasado bolan
Komo un pasharo en el sielo.
