Despues de la muerte del rey Juan en 1494, Manuel I “el fortunado” (1495-1521) suvyo al trono, restoro la libertad de los Djudios i alevanto las duras distinksyones entre los Espanyoles desplasados i los Djudios portugezos nativos. Ma, las esperanzas de un peryodo de trankilidad por los Djudios se deteryoraron kuando se empeso a kestiyonar la lejitimidad del rey komo eredador del trono. El se kazo kon la prensesa Isabel de Espanya para konsolidar su pozisyon i someter a toda la peninsula iberika a un solo monarko. Ma, Isabel le disho a Manuel ke solo se iva kazar kon el kon la kondisyon de ekspulsar a los Djudios ke se topavan en Portugal. Su kontrato matrimonyal se firmo el 30 de Novembre de 1496 i, sinko dias despues, el 5 de Desembre 1496, Manuel emityo un dekreto ke ovligava a todos los Djudios a abandonar Portugal antes de Octubre de 1497.
Manuel nunka estuvo kontente de su desizyon, prinsipalmente porke apresyava la valor i la kapachidad ekonomika de los Djudios para el paiz. Para azer difisil la salida, izo Lisbon el uniko puerto de salida posivle. Tambyen perkuro a konvertir al Kristianizmo a munchos Djudios ke pudo para ke se keden en Portugal. Ni la persuasyon ni la tortura dyeron rezultado. El Gran Rabino, Shimon Maimi, muryo en rezistyendo a la konversion.
El 19 de Marso de 1497 (primer día de Pesah), se ordeno a los padres Djudios de trayer a sus ijos de entre kuatro i katorze anyos a Lisbon. Kuando arivaron, se les disho ke ivan a tomar sus ijos i los ivan entregar a las famiyas katolikas para engrandeserlos komo buenos katolikos. Los chikos fueron literalmente arankados de sus padres, i syertos fueron asfiksyados; munchos padres preferaron suisidarsen i matar a sus ijos antes de ser separados. Despues de un tyempo, syertos padres akseptaron a ser baptizados djuntos kon sus ijos, myentres ke otros sometyeron i entregaron a sus ijos.
En Oktubre de 1497, unos 20.000 Dudios vinyeron a Lisbon para aparajersan para partir verso otras tyerras ajenas. Fueron konduizidos al patio del palasyo Os Estaos i vinyeron papazes para aprovar a konvertirlos. Syertos kapitularon, myentres ke el resto esperaron asta ke pasara la ora de la partida. En un segundo paso, a los ke no se konvertyeron se les disho ke ivan a peryer sus libertad i serian esklavos. Munchos mas sukumbyeron. Finalmente, los ke no akseptaron dainda fueron arozados kon aguas de baptizmo i fueron deklarados "Kristiyanos muevos" (konversos o anusim).
Los konversos empesaron a emigrar sin atirar la atansiyon i kuando se apersivyo Emanuel, en repuesta el 21 de Avril de 1499, les defendyo el derecho de emigrar a los Kristiyanos muevos, komo se dezinyava ofisyalmente esta mueva klasa. Deshando a un lado los nombres teknikos, la mayoriya portugeza los konsideravan komo Djudios.
