En pasadas meldi un artikolo enriva las kuras de remedios populares (kuras enventadas).
En meldando me akodri, en mi chikes, kuando me aziya grip, afilu ke yamavan doktor, mi nona paternel me untava tenturdiot en la espalda; si teniya alguna dolor de tripa de vista me metiya tovajikas kayentes i me aziya una supa de gueso de puli i por siguro me aziya bever un flamuriko.
Savesh ke el VIKS nasyo de un padre ke keriya apiyadar a su ijo regalado?
Yo no saviya, alora meldaremos esta istorya verdadera.
Al final del siglo XIX. una noche, en los Estados Unidos, en Carolina del norte, un ijiko yama a su padre en yorando i tosyendo:
“Papa, tengo una dolor en el pecho no esto puedyendo respirar; apiyadame”.
El padre nombrado LUNSFORD RICHARDSON, es vedra ke era un farmasyen ma akea noche era un padre dezesperado porke dinguna kura no le estava aprovechando.
De vista se fue en korriendo a la farmasiya, entro al laboratuar i empeso a bushkar materyales, topo syertas kozas ke avre el suluk i empeso a mesklar todo lo ke teniya, komo alkanfor, mentol i okaliptüs, solo lo ke keriya era darle un poko de respiro de ayre fresko a su kerido.
A la fin ya topo, izo un inguente ke se frega en el pecho ke korta la tos i aze durmir trankilamente.
Esta manera el mundo konosyo el VIKS.
Primeros tyempos dingunos no lo konsideraron, Lunsford, kaminava de puerta en puerta para azer konoser esta kura, la djente no se estavan kreyendo ke va aprovechar ama en el anyo 1918 kuando empeso la epidemiya de grip en el mundo entero, esta formula, empeso a ganar grado i vino diya ke los bokalikos no abastavan.
Este medikamento topado de una persona, empeso a sanar miles de personas.
Oy, konosemos esta golor komo una kerensya de madre. Myentres esta golor es, una topadura silensyoza de un padre ke bushkava solusyon para ke respire un poko su ijo kerido.
Los anyos paso, este ijo se engrandesyo i dyo un repotaje a una revista dizyendo:
“A mi madre le plaziya muncho esta kura, tanto le plaziya ke no la deshava de la mano, mos espantavamos no seya ke la koma por komida, kada diya keriya untarme en el puerpo entero. Komo teniya astma syempre la empleyava, solo povereta, eya teniya un remorso ke malorozamente peryo un ijo antes ke se tope esta formula.
