Era los primeros anyos de Mrs. Alverez komo maestra en una negra parte de Bronx. Era maestra de segunda klasa i teniya una kreatura kayada en la klasa, Karlos. Karlos teniya difikultades para ambezar a meldar.
Karlos biviya kon su madre en un viejo apartamento. Su padre, ke aviya abandonado su madre, biviya en el mizmo apartamento, se komportava komo si no lo konosiya a su ijo. No avlava kon el, ni mezmo lo saludava kon la kavesa.
Esto estava destruyendo Karlos, no teniya konfiyensa en si i sus difikultades en la eskola estavan pujando su sufrimiento. La Sra. Alverez se esforso muncho para ayudarle a meldar; ma malorozamente no reusho.
A la fin del anyo, la Sra. Alverez resivyo una nota ande estava eskrito su dover para el anyo sigiente. Le dieron la oportunidad de trokar eskola. Era una buena eskola i Sra. Alverez estava muy emosionada.
Un diya despues, la madre de Karlos vino a avlar kon la Sra. Alverez: "Ayudates a mi ijo Karlos este anyo. Grasias". La Sra. Alverez meneyo la kavesa kon modestia. La madre de Karlos repeto: «Karlos dainda no save meldar. Me esto inkyetando. Si le ambezas a meldar, esto segura ke se va ambezar. Kreyo ke se va pyedrerse si ampesa de muevo kon un muevo profesor. Le esto rogando, Sra. Alverez, ke por favor se kede kon mi ijo. Ambezale a meldar».
La Sra. Alverez se fue a kaza akeya noche i penso en la suplika de la dezesperada madre de Karlos. Era la suplika de una madre imigrante ke konosia a su ijo i saviya ke grande parte de su vida dependiya de su kapasidad para meldar. Es definitivo ke Karlos iva kedar atras. A la demanyana sigiente, la Sra. Alverez le demando al direktor ke la deshe pasar de klasa kon toda la klasa de Karlos. El direktor aksepto. El anyo sigiente paso presto. Estuvo dando un poko de ekstra atansion a Karlos. Estava esperando ke las kozas ivan a ir bueno kon esta kreatura timida i espantoza.
La madre de Karlos no vino a la eskola este anyo. Munchos anyos despues, la Sra. Alverez estava dando klases en una eskola en otro barrio del Bronx. Era fin del anyo, i se kedo en la eskola un poko mas tadre para arekojer sus kozas i alimpiar su klasa. Kuando eskapo, salio del edifisio i se fue al otoparko. Kuando arivo al otoparko, el ayre izo bolar los papeles de su mano. Se aboko para arekojerlos. Dos mansevos ke estavan pasando de aya, le ayudaron a arekojer los papeles.. "Grasias, mansevos’’ disho la Sra Alverez. El uno de los mansevos la konosio. "Sra Alverez’’ disho. Era Karlos, se aviya engrandesido, estava alto i grasiozo. Sin timides, se abrasaron. "Karlos, te izites un ombre". Karlos se rio de felisidad. Karlos la prezento a su amiga: "Es la Sra. Alvelez’’. "Yo ya la konosko, ma eya no me konose’’ disho la manseva. "La semana pasada eskapimos el preparatorio. Karlos fue el mijor elevo de la klasa. Dio el diskurso de graduasion enfrente de la eskola entera. En su diskurso, Karlos mos avlo de una profesora yamada Sra. Alverez ke le ayudo a ambezar a meldar, lo kudio, i lo inspiro. Es a esta maestra ke deve su reushidad disho Karlos’’.
La Sra Alverez empeso a yorar de alegria. Karlos la abraso de muevo. La amiga de Karlos ensistio a tomarle la mano.
