Un maestro ke formava las piedras, no estava kontente de su vida. Un diya en pasando delantre de la kaza splendida de un merkader riko, vido ke estavan entrando musafires muy elegantes. Se disho de si para si: “Ke merkader poderozo! Me gustariya si i yo puediya ser un merkader”. En supito, komo ke si fue una majiya, el maestro se transformo en un merkader riko. Se konvertio en un proprietario de una kaza enorme. Un diya vido un vizir ke estava aryento de una araba de oro, kon mosos i mosas ke estavan tanyendo trompetas a su onor. Se guluzuneyo de el i disho: “Makari fuera yo un vizir emportante komo este”. I de verdad ensupito se transformo en un vizir. Los mosos lo estavan yevando kon un tahtaravan de oro. El aver estava bien kayente, el sol estava kemando i dolasheyar en la sivdad kon vistidos pezgados de seda, ampeso a darle desrepozo. Miro al sol i se disho: “Este sol esta tan poderozo, makari fuera yo un sol”. El vizir, se konvertio en un sol i ampeso a espandir sus rayos. Vino una nuve preta i le eskondyo la luz. En un segundo se peryo su fuersa. De muevo se deziluzyono i kijo azerse una nuve.
El sol se transformo en una nuve i ampeso a bolar ensima las montanyas i los kampos. Ma despues de un tiempo sintio ke una koza lo estava arepushando. El ke mira por atras, vido ke es el ayre ke lo esta arepushando. I siguro komo ya mos imajinimos, se kijo azer un ayre. Disho: “Ke fuerte es el ayre, i yo keriya azerme un ayre”. Esta vez kuando se izo un ayre ampeso a azer danyos. Estava desterrando los arvoles, dezordonar las tierras i las piedras. Ma vino un lugar ke no pudo meneyar una piedra grande en su lugar. Peno, peno ma no reusho. De muevo se penso i disho: “Ke piedra fuerte. Makari fuera yo una piedra.” I pishin se transformo en una piedra muy grande. Se sintio muy fuerte. Ma ensupito se sintio una grande dolor en su puerpo. Se penso: “Ken puede ser mas fuerte de esta grande piedra?” Miro abasho de el, i vido ke aviya un maestro de piedras, kon un martiyo en la mano.
Esta konsejika mos amostra ke kada uno kale ke seya kontente de si mizmo. Kada uno de mozotros tenemos muestras proprias valores.
En Pirke Avot dizen: Ken es el mas orozo? El ken se kontenta de lo ke tiene. Esto no kere dizir ke no adelantemos, kale adelantar sin tener ojo en lo del denfrente.
