Martes pasado la komunita djudiya fyesto el muevo, Onorable Rav. Arashi Davit SİVİ en la sinagoga Neve - Shalom. El sentro kultural de Neve-Shalom estava dekorado kon flores blankas. En medyo un tapet korolado, en frente el muevo Hahambashi, todos tomando su mano en felisitandolo kon grande kerensya. En frente su mujer, Suna Sivi vistida muy simple i elegante, estava akseptando las felisitasyones.
Despues del kokteyl, mos fuimos a la sinagoga ande iva empesar la seremoniya. En primero el prezidente del Neve-Shalom, Hayim YANAROCAK izo una avla para prezentar el Rav. Davit Sivi. Despues fue la entrada del onorable Hahambashi akompanyado delantre i de detras kon hazanes ke estavan detenyendo la Hupa i en medyo el Rav. Arashi kaminando a la teva.
Entremientes los hazanes tanyendo el shofar, ke mos izo yorar a todos. El Rav. Arashi fue i bezo la mano del Rav Yeuda Adoni i se asento.
El Rav Yeuda Adoni, despues ke le metyo la kolona de oro kon los 10 komandamyentos lo bendisho i izo una avla en primero en ebreo i despues en turko.
Las estreyikas kantaron dos kantikas i despues el ko-prezidente de muestra komunita, Ishak Ibrahimzadeh izo una avla perfekta en dizyendo: Oy estamos aki reunidos para selebrar, el viaje de muestra identita de muevo. En este punto me gustaria de akodrar kon amor i respekto al Hahambashi, Rav. İsak Haleva (z.l.) ke sirvyo muestra komunita kon el korason yeno de devosyon i kompasyon. Espero ke sus rekuerdos i ensenyansas sean una luz para mozotros i mos protejen en el kamino de la pas.
Kerido Hahambashi,
Tu tambyen estas empesando oy tu muevo viaje.
Vinites del korason de muestra sosyedad. Estas empesando a kaminar delantre de mozotros para konstruir endjuntos el futuro, en asumando las responsabilitas de muestra komunidad. Todos estamos allado de ti.
El no es solamente mi lider espiritual, a vezes es mi amigo, mi maestro i lo mas emportante syempre mi ermano grande. Por esto la avla ke esto azyendo aki oy, es un privilejyo ke syento en mi korason.
Segun las ensenyansas de muestra fe, ser lider no se trata solo del poder, sino del efekto ke krea en el korason de las personas.
Bivimos en un mundo yeno de konosimyento, i a vezes un mundo sin savidurya. Un lider relijyozo no syente la nesesita de governar, porke mos aze akodrar. Akodrar ken somos, de ande vinimos… En estos tyempos difisiles, las sosyedades se syenten sin defensas, la anksyedad ogmenta i se espantan.
Spesyalmente la jenerasyon manseva se demanda:
Komo puedo bivir mi djudaizmo? Puedo pratikar mi fe komo djudyo, sin espanto?
En estos dias esto remersyando i agradesyendo a muestro estado, espesyalmente a muestros estimados governadores por apoyarmos en todo.
El Grande Rabino no es solamente el lider de los djudyos, tambyen es el Grande Rabino de Turkiya.
Es tambyen la boz de la unidad, del dialogo i la pas.
Sirvir en este dover es mostrar una postura onorable en los sirkulos internasyonales, protejar el pasado ke kompartimos en estas tyerras, kontribuir i konstruir un futuro bazado en el amor i en el entendimyento.
Mi orasyon al kerido Grande Rabino es, ke tome buenas desizyones i ke kontinue a okuparse de kada persona.
Keridos Ermanos,
Lo apoyaremos kon muestra prezensya, kaminaremos i mos ambezaremos kon el. Kero terminar mi avla kon los byervos de su mujer, Suna Sivi en remersyandola.
Suna Sivi disho: El kreador el Todo Poderozo en el anyo 1976 me izo rankontrar en Estambol kon mi alma jumela i en el anyo 1977 mos kazimos debasho la Hupa en esta sinagoga sagra. De akel dia a oy, el kerido Rav. Davit Sivi fue mi felisita, mi apoyo, mi orgolyo i syempre fue el rabino prinsipal de mi korason.
Esto arrogando al Dyo, ke tenga la fuersa, la pasensya i la sensya para poder reushir en esta misyon onorable.
AMEN.
Despues el prezidente Erol Kohen avryo las puertas i izyeron la orasyon.
El Grande Rabino termino la fyesta kon su avla perfekta, sensible i emosyonante.
