Kuando mos fuimos al tur de los Balkanes vijitimos los paizes Masedonya, Albania, Monte Negro, Bosnia i Herzegovina, Serbia. En kada paiz kaminimos unas kuantas sivdades. Kada sivdad teniya diferentes savores. Las istoryas kontavan komo bivyeron. Porke fin el tiempo serka, era solo un paiz, Yugoslavya. Despues ke se espartiyeron, tomaron diferentes nombres. Tambiyen la jeografiya estava paresida. La mar Adriyatika, los vedrudas ke aviya en los kaminos, i en las sivdades estavan abondante. En kada sivdad aviya parkos i guertas grandes, plasas kon monumentos. Abashimos del avion en Skopye. Al tur empesimos de Masedonya. El gia estava eksperto; kada sivdad ke estavamos kaminando lo estavan konosyendo la djente, o los otros gias. Mos konto ke mas de 20 anyos esta trayendo aki grupos. Pishin mos kayentimos a la sivdad. Las personas de las botikas, la djente ke estavan bivyendo en este paiz estavan muy kayentes i sempatikos. En Masedonya mos fuimos a tres sivdades. Skopye, Manastır, Ohrid. A Skopye entrimos de la puerta del arko de viktorya. Mos salyo enfrente la statua de Iskender bey. En kaminando vimos la kaza de Maria Teresa, la maalle de los Dludyos. En esta kaleja aviya la Sinagoga i aryento el muzeo de Olokosto. El Rio de Vardar estava partyendo la sivdad en dos. Aviya ensima el kupri Tash Köprü. En kaminando mos salyo enfrente la muraya de Skopye. Mas de esto las Meshkitas Yahya Paşa, i Mustafa Paşa, Davut Pasha hamam, Kaptan han. En la viyeja sivdad ke estava serrada al trafiko aviya el kyoftedji Desta. Los amigos komyeron i mos disheron ke estava la savor de lamber el chini. Mos disheron ke la patiseria Rigara es muy ermozo. Entrimos, komimos Trileche i Biskocho de Almendra aryento kon kaymak. La Agua de arandanos, estava komo dizen los muzulmanos zem zem suyu. Una savor lokura. Vimos Borekchis entrimos i gostimos de las borekas de los Balkanes. Estava muy savrozo.
Otro diya mos fuimos a Manastır. La sivdad ande meldo Ataturk. Tambiyen aki kaminimos la sivdad en kaminando. La kaye Shirok, ke es serrada al trafiko, en indomos a la eskola ke agora es un muzeo, en el kamino pasimos del Bedesten ke kedo del tiempo de los Otomanos, las Meshkitas Ishak Pasha i Yeni cami, el Charshi ke se yama Turko. La demanyana ande izimos dezayuno en el bufe aviya unas kuantas komidas diferentes, komo Soka, i Lutenitza. Son los mezelikes espesyales de los Balkanes.
La tresera sivdad ande mos fuimos en Masedonya era Ohrid. En el kamino mos aretimos en Resne i vimos la kaza ande bivyo Resneli Niyazi. En primero vijitimos el Monasteryo Naum. Despues en kaminando vimos la Mishkita Ayasofya, del tiempo de los Otomanos, Halveti Tekkesi i la plasa ke se yama Chinar. Akeyas kazas paresiyan a las de Safranbolu. Despues salimos kon motoriko para azer el tur en el Lago de Ohrid. Akeya vez vimos la sivdad de la parte de Lago.
Si vinimos al sujeto de la eskriturya el dulse Trileche, es una pasta spesyal ke se aze en los paizes Balkanikos. Porke se apareja kon 3 diferentes leches por esto se yama Trileche. Ensima se echa sos de karamel, o sino shokola o frambuaz. Agora tambiyen en Estanbol se esta vendyendo esta pasta, ma la savor ke komimos aya estava muy diferente. En komyendo no mashkimos di ke parese lo englutimos.
