Sandler es aktor, komiko, eskritor i produktor. Gano popularidad en la dekada de 1990 komo miembro del kadro de los aktores de Saturday Night Live i gano una grande kariera en el sinema, en kreando su propio jenero: el sine de Adam Sandler.
Sandler tiene la aparensia de judio i la kondukta de judio. Tiene kaveyos frizados i tiene partikolaridades judias: intelijente, enerjetiko i aziendo djestos bovos.
El stilo komiko de Sandler es konosido por komedia fizika, personajes egzajerados, i kantikas umoristikas. Frekuentamente, en sus filmos, aze referensia a la kultura, las kostumbres, las tradisiones, i las fiestas judias. La djente pueden dizir ke la parte judia de su komedia va atirar demaziya de atansion, espesialmente en una perioda ke el antisemitizmo esta tan alto. Sandler no se chekineya. ‘’Yo so judio’’ dize el, i lo dize kon orgolyo.
Sandler kontribuyo a la prezervasion i reprezentasion de la kultura judia en los medios de komunikasion. Munchos aktores judios trokaron sus nombres judios i se detienen de dizir ke son judios. Adam Sandler no es komo eyos. El abrasa sus raizes judias.
La reprezentasion ke Sandler aze de personajes judios i su uzaje de umor kon raporto a la kultura judia, tambien atira la atansion de miliones de no judios. Esto, lo konvertio en un simpatiko egzamplo para la komunidad judia.
No es egzajerado de dizir ke la kantika de Sandler "Hanuka" ayudo a pujar la konsiensia i el orgolyo por la identitad judia i la apresiasion de la kultura judia. Los filmos "Ocho noches lokas’’ i "El martiyo ebreo" kontribuaron tambien a la kultura judia. Sandler inkluyo a sus ijas en su filmo ‘’No sos envitada a mi Bat Mitzvah’’.
Una de las kontribusiones de las mas konosidas de Sandler a la kultura judia es la kantika "Hanuka". "Hanuka" selebra i aze konoser kon umor los personajes famozos judios. La kantika se konvertio en un imno judio."Hanuka" es tan popular durante las fiestas ke kaje tanto komo "White Christmas" de Bing Crosby...
Adam Sandler esta diziendo: "Kuando era chiko esta perioda del anyo siempre me aziya sintir un poko ekskluido. Porke en la eskola aviya munchas kantikas de Christmas i las kreaturas judias solo konosiamos la kantika 'Dreidel Dreidel Dreidel'" ekspliko Sandler. "Por esta razon eskrivi una mueva kantika de Hanuka para ke la kantemos las kreaturas judias i espero ke les estara plaziendo".
Esta kantika fue lansada komo "single" en 1995 i se konvertio en una favorita kantika. ‘Hanuka’ entro mizmo en las listas de reproduksion de Christmas. En la kantika metio en sira una lista de nombres de las selebritas ke son kompletamente judias, las selebritas ke son medio judias, i las ke son konversos judios.
Sandler enterpreto la kantika komo parte de su stand up. "Hanuka" se sentra en el tema de Hanuka, en las kreaturas judias ke se sienten ekskluidas durante Christmas i los nombres de las selebridades judias.
