Vini Ermanos Keridos
Asenderemos la Hanukiya
Para akodrar la maraviya
Ke mos izo muestro Sinyor
Dyo de Justisya i Amor.
XXX
O mi Puevlo tan amargado
I tantas vezes aharvado
Alevanta tu kavesa abokada
Enderecha tu espalda kansada
Para ti siempre briyera la Luz de la Menora
XXX
Anyos de ansya pasimos
De muestra Ley no espartimos
A muestra Fey mos atimos
I a delantre kaminimos
XXX
Mira mi puevlo, en la kavena de las jenerasiones
Se paso las tradisiones
Luz de la Bendisyon
De alegriya i de Amor.
XXX
Agora muestro sielo se arelumbrera
La esperansa kantara
Todo bueno se azera
Viktorya i Pas avera (reynera)
XXX
Sonriye enfin mi puevlo
Para ti sufriensa no avera
Porke en kada ijo de Israel ke nasera
Un gloriozo Makabe se alevantara.
Silva Filiba
