Alhad pasado mos fuimos kon amigas a un teatro en Balat ke mos plazyo muncho. El nombre de la pyesa era TEBDİL ke kijo dizir Trokamyento.
A vezes te enkontras en una eglisya en las kayes segundaryas de Unkapanı, a vezes puedes enkontrarte en un kafe en Balat, komo este djugo.
En otras palavras, los djugos tambyen tyenen su propya tansyon.
El eskritor, Ahmet Özbudak en el teksto de la ovra eskojo un kafe en Balat. El djugo fue fizikamente transportado al kafe Pops en Balat. Kuando entrash al kafe, a la entrada de la puerta, ay un espejo kon sesh refrijeradores ke okupan la grande partida de la pared.
Las siyas para los spektatores estan apegadas a los lados de la sala. En la entrada de la puerta se desho un espasyo en forma de koridor.
El djugo esta de detras del banko, esta pasando en este koridor i en la kaye.
Estamos observando las shenas ke se estan pasando en la kaye, de las ventanas del kafe. Los vizinos de la kaleja ke estan pasando por ayi observaron a los aktores de detras los vidros de las ventanas. Algunos vizinos kon kuriosidad, otros mirando a eskondidas. En otras palavras, es una ovra ke tyene munchos espektatores.
En vinyendo al sujeto de la pyesa, reelmente, Süleyman tyene un ermano buchuk, al ke no lo ve, aze munchos anyos.
Para krear una rutina kon sus dos amigos en un kafe de Balat, kon echos medyo ariskuros, esta tratando un lugar respektado para si mizmo en el mundo ande estamos bivyendo.
Mantyene una relasyon pasyonada, ruidosa, interminente kon su novya de la maalle.
Una noche una mujer no envitada vyene al kafe i aze una oferta enteresante i immoral, ke esta ovligando a Suleyman a enfrentarse a su buchuk Talat i a si mizmo despues de munchos anyos.
Despues de esta reunyon, la desizyon ke tomo Suleyman va trokar la vida sin pueder ir atras, la vida de el mizmo, de sus amigos i de su amante.
El djugo mos arasta felizamente asta el final sorprendente.
Fue una eksperiensya teatral muy diferente para mi.
Ay kaji sinko anyos a kavza de la pandemia ke no me fui a un teatro. Estuvo una ovra muy reushida. Vo lo esto rekomendando absolutamente, keridos lektores.
