Eleanor Lazarus Allatini nasyo en el anyo 1776 ija de una famiya Judiya muy distingida. Kuando el Sultan Otomano propozo fraguas a los komersantes etranjeros ke van transferar los echos a Salonik, el padre de Lazarus desido de transferar su komerso a Salonik. La muerte subito de su padre ovligo a su ija de deshar sus estudyos de Medisina de Floransa, i tornar a los echos de famiya de Saloniki. En el anyo 1802, Lazarus ampeso a lavorar i kolaborar kon el merkader industrial, Izak Modiano, ke teniya una endustriya de arina i sereales. Este Negosyo Modiano Allatini era uno de los mas modernos. Despues su muerte kontinuo sus ijos. En el anyo 1888, los ijos fondaron la Banka Saloniki, i partisiparon a todos los proyektos ekonomikos de la sivdad, Elektrik, Transport Publik, i otras aktivitades komo la Seda, i mizmo la Brasseria Naousa. En el fin del siglo, la entrepriz Allatini teniya sentros de echos en Marsilya, en Londra i en los Balkanes. Salonik se izo el sentro de navigasyon, i munchos vapores de diversos paizes, se topavan en los portos de esta entrepriza jiganteska.
Paizes emportantes avrieron konsulados en este sentro komersial, ke se izo lugar de turizmo.
Los ermanos Allatini eran konosidos por sus ovras de ayudo, i fondaron una eskola para los de menesterozos de la Keila Judiya.
La famiya Allatini era enstalada en una villa fraguada por el Arshitekto italiano ke se yamava Vitaliano Poselli. La villa teniya tres etajes i trenta i una kamaretas, todo en stil Barok. En esta Rezidensya se topava tambien la Rezidensya de la eskola Filozofika de la Universita Aristo en el anyo 1926. Una otra kaza de la famiya Allatini fraguda en el anyo 1880 era la fragua la mas moderna de la kaleja Judiya, ke era echa por el Arshitekto Pozelli.
En el otonyo 1911, ampesa la gerra entre la İtalia i la Turkiya. Los Otomanos serraron todo modo de entreprizes en el teritoryo Turko. La famiya Allatini vendyo una parte de sus bienes de Salonika a firmas Gregas i se fueron a la Italia. Oy se puede ver estos lugares de Allatini komo sentros turistikos, ke mostra las ovras del pasado i la istorya de la famiya Allatini.
En la Banka Saloniki de Turkiya yo lavori i ize staj kuando eskapi la eskola. Todo modo de operasiones i eskritos se aziyan en Fransez, i se avlava en esta lingua. El Direktor era Fransez, Monsieur de Lavernet. Me ambezi munchas kozas i ize munchos amigos, todos vinyeron a muestra boda mizmo el Direktor de la Banka.
Rekuerdos del pasado ke me vienen a los ojos, fin oy en diya .
