Un tiempo eran dos amigos. Eran buenos amigos. De ke se konosieron, nasyo entre eyos una buena amistad. Avlavan asta las noches, avlavan de sus futuros, de sus esfuenyos. Eran los solos ke se entendiyan.
Ma en supito no se save lo ke afito, se alesharon. Todos los dos ya saviyan ke la kulpa estava en eyos… Mas no eran amigos, eran, se puede dizir konkurentes.
El uno no estava puedyendo akseptar ke era el kulpavle. Ma esta ravya le estava muncho deranjando su konsiensia.
Mas no moravan en la mizma sivdad. El uno estava en el norte i el otro morava en el sud. Una vez el del norte (ke es el ke avlamos) viyajo asta el sud. Se fue asta la kaza del amigo. Se fue asta delantre de la puerta, alevanto la mano ke va sonar, ma una fuersa lo areto. El aviya vinido para demandarle ekskuzas i azerse demuevo amigo komo antes. Aya se rendio kuento ke demandar ekskuzas era una koza muy difisil. A la fin, torno atras i se fue a su kaza. En el kamino aviya un otomobil delantre de el, detras estava eskrito: “Amigo, te pedrites”. El kamino entero estava pensando komo se iva eskapar este djugo de kriyaturas.
Un diya se disho: “Ya abasta, seya lo ke seya, me va ir i le va demandar pardon”. Se fue demuevo a la kaza del amigo i bateyo la puerta. Una mujer ke no konosiya le avriyo la puerta. El le konto la razon de su vijita. La mujer le dyo una letra en diziendo ke su marido la desho a este amigo. Aya estava eskrito:
“Kerido amigo,
Malgrado ke mos aviyamos peleyado, no kedi nunka de amarte, ma kije ke tu agas el primer paso para azermos paz. Bovedad ke ize. Ya te vide por la ventana ke vinites. Arogi ke sones la puerta, ma no sonates. Kuando te tornates, kije yamarte, kije gritar; ma no pude. I tu te fuites en deshando vaziyo mi korason. Si estas meldando esta letra, es ke ya vinites de muevo, kero dizirte ke yo de mi parte ya te perdoni”.
Se alegro el amigo i disho a la mujer: “Ande esta tu marido? Ya tengo muncho tiempo para esperarlo”.
La mujer teniya lagrimas en los ojos en respondiendole. “Mi marido malorozamente mas no esta en esta vida. Esta letra para ti, la desho kon su testamento”.
Araviar no es bueno, puede eskureser munchos anyos de muestras vidas. La vida es kurta i los amigos son presiozos. No devemos de deshar ke el orgulyo mos aparte. Si afita una koza semejante no kale asperar para azerse pas, el buen momento es agora.
