Nicholas Winton, un korredor de borsa de 29 anyos de Londra, estava planifikando unas vakansas de ski kuando un amigo le propozo de vijitar Praga. Lo ke vido aya troko su vida por entero.
Sienes de famiyas, la majorita judias, estavan dezesperadas para salvar sus kreaturas, porke la gerra se estava aserkando. No teniya titolo ofisial, ni orden governamental, ni plano. Ma teniya konsiensia. Delantre una chika meza de komer en su kamareta en el otel, empeso a organizar lo ke se iva konvertir en uno de los aktos de eroizmo de los mas diskretos de la istoria.
Winton eskrivio a ambasadas, negosio kon fonksionarios britanikos i ogmento fondos para obtener bilyetos de treno para las kreaturas ke no teniyan otro lugar ande ir. Lavoro kon voluntarios, topo famiyas en el Reynado Unido ke estavan prontos a avrir sus kazas a estas kreaturas.
Entre marso i ogusto de 1939, ocho trenos partieron de Chekoslovakia kon sienes de kreaturas ke se ivan a salvar de la gerra. Kada kreatura yevava una chika etiketa kon un numero enriva. Detras de eyos, los padres i madres estavan en los platformas en lagrimas, saviendo ke no ivan a ver mas sus kreaturas.
El mueven treno, kon otras 250 kreaturas, estava programado para partir el 1 de septembre de 1939. Esta demanyana, Alemanya invadio Polonya. Las frontieras se serraron. Nunka mas no vieron a sus kreaturas.
Winton torno a Inglatierra i kontinuo su vida trankila. No lo konto a dingunos lo ke aviya echo: ni a sus kolegas, ni a sus amigos, ni a su mujer kerida.
Kaji sinkuenta anyos despues, en 1988, su mujer deskuvrio un album ariento de polvos en el atiko. Ariento del album, aviya fotografias, listas de nombres i letras de padres i madres rekonosientes. Avlo kon un jurnalisto, unos kuantos diyas duspues, la BBC envito Nicholas a un program de televizion: "Esto es la vida!".
Se asento kon modestiya en la primera sira. Entremientes la prezentadora deskrivio komo aviya salvado sienes de kreaturas. Duspues demando a la odiensa: "Ay en muestra odiensa esta noche alguno ke le deve la vida a Nicholas Winton?". A su alrededor, la djente empeso a alevantarse en piez, una atras otra, asta ke la sala se incho de ombres i mujeres adultos ke fueron las kreaturas ke el salvo. Empesaron a aplodisar, i las lagrimas empesaron a korrer finke Nicholas a la fin entendio la grandeza de lo ke aviya echo.
Sir Nicholas Winton fue nombrado kabalyero en 2003, mezmo nunka duspues, se konsidero komo un eroe. "Solo viya djente ke teniyan menester de ayuda", disho. "Si una koza no es imposible, deve de aver una manera de azerlo".
Se murio en 2015 a la edad de 106 anyos, anturado de la erensya de 669 vidas, i de jenerasiones ke egzistieron porke un ombre, en tiempos difísiles, desido a davranearse en silensio en lugar de dar la espalda.
A vezes, los grandes eroes son los ke nunka bushkan rekonosimiento. Solo azen lo ke la buendad demanda i trokan el mundo en silensio.
