Ay paizes ke me plaze irme i viyajar de kontino. Las sivdades de Italya son de estos. La lingua, la musika, las komidas, las djentes me plazen muncho. Fin agora me fui a Milano, Como, Bari, Verona, i a Venesia. Kada sivdad tiene diferentes ermozuras. Por egzempyo en Milano la plasa i la Katedral de Duomo, las kayes Vittorio Emanuel i Via Buenos Aires, la Istasyone Centrale, la kaza de la Opera, La Scala de Milano, en Como el Lago, en Verona la kaza de Romeo i Julyet, el Collesium ande en estos diyas estan azyendo en esta Arena demostrasyones de Opera. En Bari el kazal ke se yama Alberobello. La mas enteresante sivdad es para mi Venesia. La Lagun, El Baziliko de San Marko, tambien la plasa, las Gondoles, los Kupris, el Getto del tiempo de la gerra Mondial. Las eskaleras de la estasyon del treno es muy enteresante. Los turistos se asentan aki i miran a la mar. Las noches los mansevos se asentan aki kon las biras en la mano i tanyan gitara i se engleneyan. Kaminar kon una Gondol es muy ermozo. Tomash keyf diferente. Si pagash un bahshish al kapitan vos kanta i aryas. La Plasa de San Marko es bien grande. La Bazilika es una ovra maestra de arkitektura. La vista de afuera kon las estatuas, es de ver. Aryento los vitrayes i la vista i el akustik es una koza lokura. Ay 435 kyupris de la sivdad. El mas mostrozo es el kupri Rialto. En kaminando en las kalejas mos salyo enfrente el Getto. Aryento tiene 2 Sinagogas. Aryento de estas Sinagogas se kamina kon gia. En kaminando vos parese ke estash aryento de un Labirent. En las botikas de regalos turistikos se vende munchas maskas. Yo no me topi ma la djente kontan ke en el festival de Venesia las kayes son yenas kon vistimyentas i maskas del siglo 16.
Si vinimos al sujeto de la eskriturya, los dulses i las pastas de los paizes TIRAMISU - PANNA COTA - CANNOLI - MASCARPONE – BISCOTTI son las pastas i biskochos ke se konosen mas muncho de Italya. En jeneral se apareja kon kezos diferentes. El Tiramisu ke komi primera vez en mi vida era en Milano. Un diya kuando estava en Venesia, entri a un restorante, komi Pizza. Despues de komer keres una koza de dulse me demando el garson. Kualo ay le dishe; me disho dondurma, tiramisu, Panna Cotta ets. Primera vez ke oyi este dulse, Penna Cotta. Kije gostar. Kuando me vino kon la sos de frambuaz, solo la vista estava para lamber. Kuando empesi a komer me chupi i los dedos.
En kaminando en las kayes vide patiserias; me enteresa, entro i miro kualo estan vendyendo. Los Bishkochos ke se yaman Biscotti son manera i manera. Kon Shokola, kon almendra, kon uva seka, ets. Las personas vide ke estan komyendo Cannoli allado de kafe Espresso. Komo el Paiz ke me plaze muncho tambien i las dulsuryas son muy savrozas de Italya.
