Martes pasado me envitaron a ALEF, una organizasyon bendicha ke se okupa de los aedados.
Dos vezes a la semana arekoje 35-40 personas i los toma kon minibuses fina ULUS LİSESİ.
A las dyes de la demanyana estan todos prontos asperando el minibüs en Şişli. Kuando vyenen a ALEF, les ofren chay i kave kon unos unturyos salados i dulses i despues ampesa el program. En primero una manseva les amostra unos kuantos movimyentos jimnastikos asentados en las siyas, para azer lavorar los muskulos.
Despues de la jimnastik, se realizan diferentes aktividades komo: pintar, azer djoyas falsas, azer objetos kon diferentes elementos i otras kozas…
Las volontaryas lavoran de alma i korason.
De vez en kuando envitan personas ke saven el ladino para entretenerlos kon sujetos diferentes i kuentos komikos.
El sujeto mio era un poko de aki, un poko de aya.
En este viaje de muestra vida, devemos de ser konsientes de lo ke estamos bivyendo. Kale agradeser a todo ke mos dyo el Dyo Todo Poderozo.
Kada demanyana avrimos la ventana i respiramos el ayre fresko de la demanyana. Salimos a la kaye, kaminando vemos las ermozuras ke tenemos en el doredor.
Estamos konsyentes de lo ke estamos bivyendo?
Lo mas emportante estamos orozos?
Bivir kada momento kon konosimyento i volunta, es solamente muestra preferensya. Puedemos empesar a agradeser la respirasyon ke tomamos i el sorvo de agua ke bevemos. No mos olvidaremos ke esta vida es un regalo muy presyozo para mozotros. No mos olvidaremos ke la vida no se puede komandar. Bivimos lo ke esta eskrito.
El pensamyento positivo es un talento ke se puede ganar de mas tadre, no es la kapachita ke vyene del nasimyento. Mos ambezaremos a bivir kon la tristeza ke peryimos a un kerido, kon el stres i la non-reushita.
Pensar pozitivamente puede trokar muestra vida.
Eskrivir un livro por egzempyo, un artikolo en un jurnal, mos aze pensar a kozas buenas i esto mos sostyene i mos yeva adelantre.
Si estamos sanos i rezyos, si tenemos una famiya, un echo, si tenemos lo ke mos yevara asta el futuro, reelmente tenemos muncho.
Mi avla sureyo kaji una ora. Todos los partisipantes estuvyeron muy kontentes i me arogaron de eskrivir este kuento ke les konti.
Aviya un rey muy malo, muy kaprisyozo. Un dia se alevanto de la syedra i disho: Yo kero saver kualo es la mijor komida del mundo. Si la repuesta me plazyo, le va dar de todo lo bueno, ma si la repuesta no me plaze lo va echar al zindan.
Kada uno se estava espantando sin saver kualo azer. Yamo a Zevulun. Zevulun disho: La mijor komida es avas sekas kon aroz. Echalo al zindan grito el rey.
Despues vino Salamon. La mijor komida es koftes de prasa.
Al zindan, dyo orden el rey. Vino Menahem.
La mijor komida es el peshkado de gaya. Al zindan grito el rey.
A la fin vino el torno de Djoha. El ya estava muerto del sar i antes de irse delantre del rey, fue a ver su padre prove ke era un kimurdji. Le demando: Papa ke va azer? Sino supe la repuesta, el rey me va echar al zindan.
El padre de Djoha le disho:
Ijo mio, la mijor komida del mundo es la AMBRE. Si estas arto nada no te plaze, ma si tyenes ambre, mizmo el pan seko tyene savor.
Ansi Djoha se fue al rey i le dyo esta repuesta.
Al rey tanto le plazyo esto, ke lo tomo a Djoha i a su padre al saray i les dio todas las rikezas fista la fin.
