Antes de salir al viyaje me aparejo ande me va ir, kual muzeo es mas importante, kuala kaye es serrada al trafiko porke aki kaminar es muy ermozo. En ke restorante puedemos komer, ande ay restoranes Kasher i ke patiseria es mas popular. Kuando desidimos de irmos a Portugal, komo en kada viyaje empesi a lavorar. Kuando se dize Portugal, miri ke todos estan metyendo en sira unas kuantas kozas privadas komo Tramvay, Yokushes, Asansor de kaye para suvir de una kaleja a la otra, motorikos ke estan transportando personas komo taksi, ke se yaman Tuk Tuk. Topi unas kuantas komidas i pastas spesyales komo Bacalao ke es un peshkado ke se apareja de modos diferentes. El peshkado Sardalya i Pastel de Nata. Ke es la spesyal pasta de Portugal? Debasho ay una chanaka de masa de milfoy, ensima se mete un mallebi, despues se da al orno, kuando se aze roze, se kita i ensima se mete si keresh, asukar de pudra, o si no kanela. Se puede komer en una asentada 3-4 deyos kon kafe. El paiz del kavo de la Evropa, en Portugal las mas turistikas i famozas sivdades son Porto i Lizbon, ke es la kapital. Ay unos kuantos anyos ke se izo moda de ir a esta destinasyon.
En Porto los mas importantes lugares para los turistos son El Kupri Dom Luis I, la istasyon de los trenos Sao Bento, la plasa Riberia, la Katedral de Porto, el Rio de Douro; en el sentro de la sivdad el Majestik Kafe, el bazar serrado Mercado do Bolhao, la Sinagoga, i las sivdades ke son muy serka a Porto Braga, Guimares i Fatima, son lugares de ver.
En Lizbon ke puedemos ver i kaminar si dezeash, en primero kale ver el monumento de los Eksploradores. La kula de Belem, el Konvento de Jeronimos, Cabo Roca, Sintra Nazare, Obidos, Cascais, son lugares i sivdades de ver. Kon los Tuk Tuk kaminar es muy ermozo; el konduktor vos eksplika los lugares de ande estash pasando i kaji una ora azesh un keyf.
Porke es un paiz en el bodre de la mar, las komidas de peshkados i tambiyen produktos de mar son baratos i muy savrozos. Vos trayen a la meza kon un show en los restorantes.
La muzika es muy enteresante i se yama Fado. Vos puedesh ir las noches a los bares de Fado i sintir esta muzika. Los vinos del paiz se save ke son muy buenos. En oyendo el Fado una kupa de vino kolorado se va muy bueno.
