Se yamava Sra.Thompson. Les disho a sus elevos ke los keriya a todos igual. Ma esto era imposivle. Aviya un elevo en la klasa yamado Teddy Stoddard. Sra. Thompson aviya observado Teddy el anyo pasado. Teddy no djugava kon los otros elevos, su vistimienta estava suzia i teniya menester de lavarse.
Kuando Sra.Thompson estava korijando el egzamen de Teddy, kon un kreyon kolorado aziya X enriva de los yerros i metiya un grande F a la parte superior del papel.
En la eskola ande ensenyava la Sra. Thompson, kaliya ke revizara la istoria akademika de kada elevo. Kuando revizo el de Teddy, tuvo una sorpreza. La maestra del primer grado de Teddy eskrivio: «Teddy es una kreatura briyante i de riza fasil. Toma buenas notas. Es un plazer de estar kon el». Su maestra de segundo grado eskrivio: «Teddy es un estudiante ekselente, sus amigos lo keren muncho bien, ma esta preokupado porke su madre tiene una hazinura negra i la vida en kaza deve de ser muy difisil». Su maestra del terser grado eskrivio: «La muerte de su madre fue muy dura para el. Se esta forsando a azer lo mijor ke puede, ma su padre no se esta okupando de el». La maestra del kuatren grado de Teddy eskrivio: «Teddy no esta amostrando muncho entereso en las lesones. No tiene munchos amigos i a las vezes se esta durmiendo en la klase».
La Sra. Thompson se averguenso de si, kuando se ambezo el problem de Teddy. Se sintio mas negro kuando sus elevos le trusheron regalos en el Dia de Profesoras. Los regalos estavan embrujados kon ermozos papeles briyantes, eksepto el de Teddy. Su regalo, embrujado en un papel maron ke tomo del supermerkado. La Maestra se esforso para avrirlo entre los otros regalos. Su regalo era una maniya de diamantes de imitasion kon unas kuantas piedras mankas i un bokal de parfum yeno asta un kuarto.
Teddy Stoddard se kedo despues de la eskola. Le disho a la maestra: «Senyora Thompson, estas goliendo djusto komo mi mama». Duspues de este dia, la Sra. Thompson empeso a okuparse mas muncho de Teddy. Teddy empeso a lavorar i segir la leson kon atansion. Para finales del anyo, Teddy se aviya konvertido a uno de los elevos los mas entelijentes de la klase.
Un anyo despues, la maestra topo una nota de Teddy debasho de la puerta, diziendole ke era la mijor maestra ke aviya tenido en su vida. Pasaron sesh anyos, la maestra resivio otra nota de Teddy. Teddy eskrivio ke aviya eskapado la preparatoria. Kuatro anyos duspues, Teddy eskrivio ke eskapo la universidad kon los mas altos onores. Le aseguro a la Sra. Thompson ke eya fue la mijor maestra i su favorita de su vida. Pasaron kuatro anyos mas i tomo otra karta. Agora su nombre era un poko mas largo. La karta estava firmada por Dr. Theodore F. Stoddard.
La istoria no se eskapo aki. Sra. Thompson resivio otra karta esta primavera. Teddy eskrivio ke aviya konosido una ijika i ke se iva kazar. Su padre se aviya murido i keriya ke Sra.Thompson se asente en el lugar de su madre. Sra. Thompson aksepto la envitasion. El dia de la boda se vistio i se metio la maniya de imitasion i el perfum de la madre de Teddy. Se abrasaron. El Dr. Stoddard le disho: «Grasias, Sra. Thompson, por kreer en mí. Munchas grasias por azerme sintir emportante».
La Sra. Thompson, kon lagrimas en los ojos, le oguro felisidad.
