Es ke es de saver ke ay ojas blankas en la istorya del Djudaizmo…
El 17 de Novembre del anyo 331 D.C. nasyo en Constantinople Flavio Claudio Juliano (tambyen konosido como solo Julian II). Era ijo del ermanastro de Constantine, el primer imperador romano ke rekonosyo el kristianizmo komo relijyon ofisyal del imperyo. Aunke nasyo i se engrandesyo en un enturaje nominalmente komo un buen Kristiano, kuando Juliano paso al trono en el anyo 360 D.C., era un neo-platoniko konvensido kon una fuerte antipatiya i afilu un aborresimyento kontra la relijyon kristiana (a la ke konsiderava en parte responsavle del aflakamyento del Imperyo Romano). Poko despues de suvir al trono en tal imperador, Juliano anulo munchas leyes pro-kristianas, i ansi fue sovrenomado «Juliano el Apostato», (apostato es uno o una ke salyo o troko de relijyon).
El aborresimyento de Juliano kontra los kristianos rezulto ser una valor, un avantaje inesperado para los Djudios bivyendo en el Emperyo Romano. No solo anulo los impuestos espesyales ke se les imponiyan, sino ke tambyen enkorajo aktivamente el proyekto i los planes para rekonstruir el Treser Templo de Yerushalayim. Segun la “Istoria Eklesiastika” de Salminius Hermias Sozomeno (c. 400-c. 450 D.C.), los Djudios «se kreyeron a la ideya de fraguar el Treser Templo kon tal dezeyo ke afilu las mujeres empesaron a arekojer i transportar montones de tyerra…».
Este proyekto le izo ganar el apoyo de los Djudios dispersados en el imperio. A los Djudios se les permityo arekojersen en el monte sakro por primera ves despues del egzilyo, lo kual jenero una mayor animozidad en los kristianos. No se save si el intento de restorasyon del Templo de Yerushalayim vino en repuesta a una petisyon de los Djudios o se trata de una inisyativa personal. Segun syertos istoryanos, su intento de konstruir un Treser Templo probavlemente pretendia perjudikar al Kristianizmo mas ke komplaser a los Djudios.
Ma, solamente poko despues de ke el terreno fue alimpyado i espajado, la katastrofa se abatyo sovre los planes de la konstruksyon del Templo. Segun los eskritos de Ammiano Marcelino (c. 330-c. 391 D.C.), amigo de Juliano, «Alypius de Antioch ampeso a la ovra enerjikamente kon tan ardor… kuando terrivles balas de fuego, empesaron a apareser serka del fundamyento, kontinuaron sus atakes asta ke los ovreros, despues de sufrir kemaduras kontinualmente, no pudyeron mas aserkarse del tereno, i abandonaron el proyekto (de rekonstruir el Templo)».
Si bien esta deskripsyon dramatika probavlamente se baza en los relatos iperbolikos, egzajerasyones propajados por Gregorio Nacianceno, un eroe de la Iglesya primitiva, syertos akademikos i investigadores dizen ke los lavoros de konstruksyon fueron afektados por el rash de Galilea del anyo 363 D.C.
Malorozamente, este mismo anyo, Juliano muryo durante una kampanya armada kontra los Persanos i su suksesor, Flavio Ioviano (Joviano), era un buen Kristiyano i un anti-Djudyo sin piyadad…
