Elusa es una sivdad Antigua en el Negev, a 20 km desde Beer-Sheva. Elusa era el punto de salida de las karavanas para Misrayim o para el Sinai. Esta sivdad en la Tora tyene el nombre de “Bered”, sivdad famoza por las vinyas de ande se aziya el vino. El vino blanko de esta sivdad de kaji 20.000 personas se konsiderava komo una melezina en los payizes de la mar Mediteranea.
Esta sivdad tan florisante i ke tanbyen se yamava “Haluza” dezaparesyo en el siglo 7. de la E.K. (Era Komun), enterrada debasho la tyerra del Negev. Oy lo ke se ve son pokos restos de su vida anteryor. Los istoryadores kreyeron ke esta kayida de Elusa afito de la prezensya del Islam ke prohibiya la produksyon del vino, merkansiya ke era la baze de su rikeza. Ama los arkeologos ke izyeron ekskavasyones i ke analizaron el esyerkol, se dyeron kuenta ke la kayida de la sivdad no fue en el siglo 7, por lo menos un siglo antes, ke entonses la relijyon İslamika no egzistiya. Ansi entendyeron ke esta trajediya afito despues de un grande trokamyento del klima bazado sovre las erupsyones de volkanes.
Los estudyos del esyerkol se izyeron debasho del kontrol del Profesor de arkeozooloji de la universita de Hayfa, "Guy Bar-oz”. Estos estudyos se bazaron sovre las senizas, sovre los guesos de karne i pishkado, sovre los kueshkos de uva i de azetunas, sovre los kantaros rotos de vino i vyeron ke despues de los anyos 550, no uvo mas esyerkol, notando ke en el mizmo tyempo ke abandonaron de echar esyerkol, uvo un grande trokamyento de klima en Asya i en Evropa, un trokamyento ke kavzo grandes difikultades para sovrebivir en los anyos del medyo del siglo 6 de la E.K. (Era Komun).
El peryodo friyo del trokamyento de klima fue kalkulado por el profesor de analizes del ambyente, (environnement) Ulf Büntgen de la Universitad de Cambridge i topo ke este peryodo se iva de los anyos mas o menos 536 asta kaji 660. Egzaminando lo ke afito en estos anyos, el profesor i sus kompanyeros vyeron ke uvo syertas erupsyones de volkanes en este mizmo tyempo. Las sinizas de las lavas tapando el sol, kavzaron un friyo eksesivo ke izo la vida bastante difisil para bivir por falta de alimentos, por syertas pandemiyas ke se espandyeron rapidamente, komo la epidemiya de landre en el tyempo de Justinien, el emperador del Imperyo Romano ke despues se yamo el Imperyo Bizantino, una epidemiya ke alkanso kaji al imperyo entero, inkluendo i Elusa.
Probablamente la kayida de Elusa vino kon la kayida de la ekonomiya de este lugar. Elusa biviya ekskluzivamente de la eksportasyon de vino. Las hazinuras, la ambre, el friyo metyendo fin a la eksportasyon, Elusa fue abandonada. Oy en diya savemos ke la razon de munchos evenementos istorikos fue syempre la ekonomiya.
Fuente: Megan Gannon
