Yo en chika teniya un dezeo, azerme profesora.
Kuando viniya de la eskola metiya todas las almadas ke aviya en kaza, tomava una riga en la mano i empesava a darles la lisyon ke me ambezi akel diya, en chapteando a las almadas, siguro ke oyiya gritos de mi madre ke esto kitando polvo.
Oy en dia mezmo me plaze ensenyar lo poko ke se.
En la vida no me ize profesora ma en la shena me ayego el Dyo. Achakes de muestro kerido amigo el defondo SELİM HUBEŞ, en la dalkavo versyon del djugo inolvidavle KULA 930, me eskrivyo un rolo de profesora, MLLE. BEHAR.
En mezmo tyempo Mlle Behar era mi profesora de fransez, la djugi kon grande plazer.
Agora no ay dia sin selebrasyon. Dia de medikos, de farmasyenes, de amantes, de perros de gatos etc.
Por siguro ke ay dia de profesoras i se selebra en munchos paizes kada anyo en el 24 Novembre.
Saviash ke en Japon no selebran un dia semejante?
Yo no savia fin ke meldi este artikolo.
NO EGZISTE EL DIA DEL MAESTRO EN JAPON
Un dia le demandi al profesor YAMAMOTO ke era mi amigo de klasa:
--- Komo se selebra el dia de Maestro en Japon”?
--- Mozos no tenemos dia de Maestro”
---- Kon una ekonomia, kon una sensya i teknolojia tan avansada komo puedeser ke no dash respekto a los maestros de un lavoro tan sakro?
No me respondyo. Una dia Yamamoto me envito a su kaza. A la salida del echo mos topimos, komo morava byen leshos, mos suvimos al metro. Komo era oras de salida de los lavoros el metro estava byen yeno. Supito un ombre byen vyejo se alevanto i me dyo su lugar. No le aksepti i me vino muy kuryozo ke un aedado me da lugar ma el ensistyo i me asenti. Kuando abashimos le demandi a Yamamoto:
---- Deke este vyejo se alevanto i me dyo su lugar en ensistyendo?
Yamamoto me respondyo kon una sonriza
---- Te dyo su lugar porke vido la rozet de profesor ke tyenes enriva del vistido.
---- Ke onor, alora, me envitates a komer kero merkar un dulse de ande puedo topar?
---- Un poko mas aya ay una botika para los maestros todo es muy barato
---- Solo para los maestros?
---- En Japon, los profesores son la profesyon la mas respektada. Los vendedores Japones se alegran kuando los profesores visten sus vistimyentas de akea botika. Aki en Japon, en todo tipo de transporte ay lugares apartados para los profesores, nunka no asperan torno i entran a todos los lugares, de sorte aki kada dia es dia de profesores, no ay menester de selebrar un dia spesial.
Keridos lektores, espero de todo mi korason ke todos los maestros sean onorados kon sus titros.
