Mi ija tuvo 40 anyos. Sus ermanos keriyan darle un regalo signifikante.
Los ermanos buchukes, ke son expertos en estas kozas, pensaron munchos dias i a la fin se desidaron ke van a azer un dono a la asosiasyon “Lucharemos por las bizbas” Le mandaron un kolye kon una bizba i un pedasiko de sera, i un sertifikado de donasyon. Ke regalo ermozo…
Antes, ya saviya munchas kozas de la miel: ke da fuersa, ke es buena para la tos, ke ayuda al puerpo para ser mas sano.. Ma no saviya ke Einstein, un grande savio, avlava de las bizbas i diziya “Si las bizbas desaparesen del mundo, al ombre le keda solo kuatro anyos de vida. Sin bizbas no ay polinizasyon; sin polinizasyon, no ay plantas, no ay animales.” No saviya ke el futuro de la umanidad dependiya de un animal tanto chiko, kon sus alas maraviyozas. El ombre savyendo esto todo esta serrando los ojos. El ombre esta destruyendo la natura para azer kazas, i estamos enturados de blokes de beton.
Estas kriyansas maraviyozas avlan kon el ayre. No bolan, baylan. Kon la nariz delikada sienten parfumes de las flores i yevan el polen de uno al otro. Asiguran ke los arvoles de fruta den mas frutos savrozos.
La vida de la natura es una reyna en orden. Todos biven en una sosyedad perfekta. Siempre se demanda deke la sera de la sera es egzagonal. Los matematikos dizen oy ke la forma egzagonal aze el espasio mas grande kon el material el mas poko. Las bizbas ya lo supyeron de antes mil anyos.
El ombre no esta entendiendo esta armonia del mundo. I puede ser ke no kere entender porke no le esta konvinyendo. Esta detruyendo a lugar de protejar. La natura esta avlando, no keremos oyir.
La ekolojia es el balanso entre los dos. Munchas kriyansas ke no mos plazen komen el suzio de la mar. La oja ke kaye kreye un shampinyon. Yay ken komen los muertos del kampo para salvarmos de los mikrobes. Todo tiene su lugar kon su muzika. Solo el ombre dezordona esta senfonia. Porke no se pensan ke en el travago no ay chiko u grande. El ombre kere bien lo fuerte i no mira al flako. Le parese ke va ganar siempre. Ma las bizbikas lavoran i no van a kedar de lavorar.
Komo dize un poeto, “En algun lugar un papiyon bate sus alas, en otro lugar del mundo en la mar empesa una tempesta”.
Ayudaremos tambien a las bizbikas a batir sus alas por la savor del fruto ke van a komer muestros inyetos.
