Viktor Frankl, psikiatro i eskritor, durante el Olokosto, fue embiado a los kampos de konsantrasion, ande fue privado de todo. Le dieron un numero i su nombre fue efasado. Frankl bivio desgrasias en los kampos. Eksperimento aktos de antisemitizmo, persekusion, brutalidad, abuzo fiziko, malnutrision i umiliasion emosional. Aparte de esto, la piedridad de dinyidad i la piedridad de su famiya lo sarsaneo mas muncho. Mezmo ke bivio estas dezgrasias, Frankl no se esvacheo de bivir. Los nazis no pudieron tomarle lo mas emportante: su meoyo. Frankl fondo su filozofia sovre la naturaleza umana: "la bushkidad del sentido es el motor del komportamiento de la persona".
En las brutales kondisiones de los kampos, Frankl obzervo una koza sorprendente. Los ke sovrebivieron no eran los ke tenian mas fuersa o mijor salud. Sovrebivieron porke tenian una razon para bivir, una razon para detenersen a la vida. Unos tenian un kerido de enkontrar, otros un buto de alkansar o una promesa de kumplir. Los ke no tenian un buto en la vida, no luchavan i se murian. Frankl entendio ke la fuersa de sovrebivir dependiya en el sentido de la vida.
Duspues de su salvasion, Frankl se asento i eskrivyo de memoria el manuskripto
ke aviya pedrido. En su livro, Frankl kompartio su revolusionaria teoria de la Logoterapia: "la yave para sovrebivir esta en enkontrar tu razon de bivir, mezmo en el sufrimiento". Sus selebres palavras: «Ken tiene un porke para bivir puede suportar kaje kualsiker komo». Estos biervos son la piedra de su filozofia. Su livro, "El ombre en bushkidad del sentido" fue refuzado en el empesijo, ma mas duspues se konvertio en uno de los livros de los mas influyentes del venten siglo. Este livro fue traduizido a mas de sinkuenta linguas.
Las refleksiones de Frankl ofrieron esperansa a innumeravles personas ke enfrentaron difikultades, amostrandoles ke mezmo en los momentos los mas oskuros, tenemos la libertad de elijir muestros aktos. Sus ensenyamientos demostraron ke no importa kualo la vida mos traye, tenemos el poder de darle muestra repuesta. Si tenemos una razon de bivir, (sentido) en la vida, nada no puede abatarmos.
Viktor Frankl, duspues ke peryo todo, no solo sovrebivio, sino ke transformo el sufrimiento en una poderoza fuersa ke lo izo sanar i le dio esperansa.
Deskuvre el poder del sentido en kada difikultad ke enkontras. Desha ke la saviduria de Viktor Frankl te enspire a enkontrar tu "porke" i a transformar tus luchas en fortaleza.
