Keridos Lektores,
Alhad pasado tuve la okazyon de vijitar la egzibisyon de “Vivi MENASE” ke tuvo lugar en “Schneidertemple”. Era el dalkavo dia i no keriya pedrerlo.
“Mas de 25 anyos de eksperiensa en diferentes disiplinas artistikas, mi amor por el arte pujo.
A lo largo de los anyos, la filozofia, la literatura i el bayle se adjustaron a mi amor por el arte, i gani una perspektiva muy ancha”.
Vivi esta lavorando en su atelier i realizando proyektos de artezania, resiklaje i responsabilita sosyal kon diferentes grupos de edad.
En sus proyektos i ekspozisyones, abordo diferentes aspektos del arte kon ovras artistikas komo la arteterapia, el teatro de kuklas, la skultura, el mozaiko i las mandalas son las areas en las ke resivyo formasyon.
LAS IDAS SIN TYEMPO es el nombre de esta egzibisyon ande esta empesando un viaje emosyonal.
Esta akumulando kontinualmente del pasado asta el prezente, las kozas abandonadas i indispensavles.
Durante los ultimos anyos, en los artikulos ke arekojo de su kaza, de su entorno, de su famiya i de sus amigos ke no se enviejesyeron, esta egzaminando el fenomeno del tyempo.
Esta dando una mueva oportunita a lo vyejo.
De vez en kuando para mijorar su situasyon, kale afrontar el pasado i akodrarse.
Vivi, kijo dizir ya basta a las ermozuras de esta ekspozisyon ke se fueron sin tyempo. Eyos se prepararon por este dia i vinyeron para saludar en Schneidertemple los amantes de la kolor i del arte.
MANOS BENDICHAS
Aviya diferentes artikulos en esta ekspozisyon.
Una siya vyeja ke la orno kon mozaikes de kolor diferentes i se izo mueva. Un muro yeno de mozaikes multikolores ande estavan eskritos los nombres de los donatores ke izyeron grandes donasyones a la komunita djudiya…
Un tablo ande aviya almoadas kuzidas de mano i enriva finalizados kon reliefes. Un tablo ande estavan ijikos djugando en las kayes komo muestra manseves i munchas otras kozas.
“Kuando muestros padres i madres avlavan empesavan a dizir:
En muestra epoka…
Ma no teniamos muestra… todos los tyempos eran mios…
En mi tyempo djugava djugos en la kaye…
En mi tyempo mi madre me yamava a kaza para azer una siesta…
En mi tyempo aremendava lo arazgado, adovava las kozas rotas…
En mi tyempo, aziya pelotas de papel, saleros i barkos…
Me metiya unas unyas postizas echas kon las ortandjas de la guerta.
En mi tyempo, todo el tyempo era mio. No kedava tadre a nada… sin saver lo ke es la nosyon del tyempo”.
Vİ2
