Primera vez kuando mos fuimos a Espanya, vijitimos Barcelona. Despues me fui a Madrid. Me disheron izites bueno de irte a estas sivdades ma si no te fuites a Andalusya ne se dize ke kaminates en Espanya. Pensimos de irmos a Portugal, ize el program i meti el tur de Andalusya aryento. De verdad ke este tur estava muy diferente. La estorya, la kultura, la arkitektura, los palasyos i las Meshkitas estavan a la manera de los Arabos Omeyas. En el tur ke izimos a Andalusya mos fuimos a Sevilla, Ronda, Cordoba i Granada. Kada sivdad ke vijitimos estava una mas ermoza de la otra. En Sevilla kaminimos una guerta ke se yama Maria Luisa ande aviya Palombas. Kuando les dimos kozas de komer mos vinieron a los ombros i a las kavesas. Mas de esto kaminimos el palasyo de Alkazar, i la Katedral. Kaminando aryento del palasyo, mos namorimos de ver la arkitektura de las tarasas i la guerta. Una noche mos fuimos a ver un Show de Flamenko. Se yamava el Teatro Tablao los Gallos. El lugar, la muzika, los bayles todo estava maraviyozo. El dia sigiente mos fuimos a Ronda. El treser dia mos fuimos a Cordoba. Aki kaminimos la maalle de los Djudyos ke biviyan en el siglo 11-15. Las Sinagogas antiguas, la estatuade Maimonides, la Meshkita ke oy es Katedral de Kurtuba, una fragua Manyifika.Al mazal muestro en kaminando en la Katedral aviya la orasyon del dia de Alhad. Kuando vinimos a Granada, en primero izimos el tur panoramiko i despues vijitimos el palasyo de Al Hamra. Antes de kaminar aki, el Gia mos izo la rezervasyon i mos tomo los bilyetos para entar. En kaminando las sivdades, gostimos las spesyalitas de Andulusya, komo Empanadas de kezo, de ispinaka, de la kola del Torro. Mas de esto mos vino enteresante i savrozo la Berendjena frita kon miel. Komo las otras sivdades de Espanya aviya tambiyen aki Tapas, el peshkado de Bakalao ke es (Morina), Paella, la supa Gazpacho ke se beve yelada, el kezo Cabrales ke parese al kezo Rokfor.
Las dulsuryas Arroz kon Leche, ke parese al Sutlach, Turronke es un Nugat de Espanya. El Marsipan ke en vinyendo a las tiyerras Otomanas los trusheron endjuntos, tambiyen i aki oy se kome kon savor el Masapan. Los Vinos de Espanya son konosidos en el mundo entero. Son muy savrozos. Kon estos vinos azen un beveraje espesyal ke se yama Sangriya. Se apareja kon vino i aryento diferentes materiales komo frutas i kanela ets.
Si vinimos al sujeto de la eskriturya, el dulse spesyal de Espanya es Churros, parese al dulse turko de Tulumba. El gomo i el friyir parese muncho solo no echan ensima el sherbet. Se kome al lado kon sos de Shokola ande se untan los Churros i se komen.
