Aviya dodje anyos ke aviya pedrido mi padre. Teniya vente anyos. Empesi a
entender mas mijor la dolor de pedrer un padre. Mi madre i yo aviyamos
konstruido un chiko ma feliz mundo para mozotros. Yo, estava lavorando. Un
diya ke no estava lavorando, kaminando solo en el parko, la vide. Estava
asentada ande mos asentavamos kon los amigos. "Puedo asentarme?" le dishe.
Mi korason estava batiendo kon fuersa de la emosyon. "Me yamo Gabriella" me
disho. "I yo me yamo Alfred" le dishe. Mos izimos amigos. En los diyas
sigientes, empesimos a vermos en el parko.
Empesi a verlos a mis amigos mas poko. Kuando mis amigos se kesharon, una
noche los enviti a komer para ke me pardonen. Fui al mupak a ayudarle a mi
madre. Mi madre entro al salon a meter la meza. No me va olvidar la sorpresa en
los ojos de mi madre kuando le prezenti mis amigos. Mi madre echo un fuerte
grito i se fue al mupak. No entendi lo ke estava afitando. Kuando me fui a
demandarle, no me dio repuesta, solo me miro en la kara. Estava yorando.
Paso tres mezes. Un diya tuve un musafir kuando vine a kaza del lavoro. Un
ombre vino a verme. Mi madre desparisio immediatamente. Este ombre me
demando kestinones estranyas. Duspues ke se fue, le demandi a mi madre ken
era. Me disho ke es un doktor. Disho ke vino para un check up jeneral. Al diya
mos fuimos al opital i me izieron munchas analizes. Akeya noche los ojos de mi
madre estavan kolorados de yorar. Kuando le demandi kualo teniya, me disho ke
se fue a un funeray.
Un diya, vine a kaza mas presto de kada diya, Vide ke mi madre teniya
musafires. Me fui al mupak para azer gute. Estava oyendo la konversasion de los
musafires kon mi madre. Mi madre estava diziendo ke salyo los rezultados de
los analizes. Komo el mediko aviya supozando, el nombre de la hazinura era
shizofrenia. Esta hazinura aze bivir al hazino en un mundo de fantazia.
Kuando los musafires se fueron, le dishe a mi madre ke oyi todo. Me abraso i
yoro. Le dishe ke me estava sintiendo muy bueno ma ke me estava espantando.
Mi madre me disho el diya ke mis amigos vinieron, ya aviya entendido ke estava
hazino. Me disho ke no teniya dingun amigo. Los amigos ke aviyan vinido a
kaza eran imajinarios.
Puediya ser esto un es.huenyo? Iva salir loko. Mi mundo entero era imajinario.
Akel punto me vino al tino Gabriella. Es Gabriella tambien un es.huenyo? Me
akodri ke kuando avlava kon mis amigos en el parko, las personas se riiyan. I
las ke se riiyan probablamente no egzistiyan. Me akompanyavan ande me iva.
Las gritava. Les diziya ke se vaygan.
Keriya yamarla a Gabriella. Ma, me estava espantando. Es Gabriella tambien un
es.huenyo? Mas no pude rezistir. Un diya mos topimos en muestro lugar de
siempre. Le konti lo ke me aviya pasado. Le dishe ke la iva yevar ande mi
madre. Kaliya ke entienda si Gabriella tambien era imajinaria. Mos aserkimos
de kaza. Mi korason iva salir del lugar de la palpitasion. Soni la puerta. Mi
madre avrio la puerta. Kuando la vido a Gabriella le disho: "Seygas la
bienvenida". Estos biervos ke salyo de la boka de mi madre, por mi, eran
bendichos komo una orasyon.
Nota – Esta estorya es verdadera. Agora Gabriella i Alfred estan kazados, i
tienen una kreatura.
