Mi madre aze komidas maraviyozas. I eya se ambezo de su madre. Yay anyos ke
topa siempre la mizma savor en kada komida. Oy en dia ke esta kon la kavesa bien
klarika para pueder avlar de politika kon mi, me desidi de formar un livriko de sus
reseftas. Mi intisyon era de azer kon eya lo ke eya nunka izo. Keriya ke las reseftas
de boyikos de pimienta, la agristada, el almodrote, las albondigas de prasa de muestra
famiya seyan eskritas i guadradas.
Avía merkado un komputer muevo, i ya savia enpleyar un poko de Word i Excel.
Pensí meter tambien unas kuantas fotografías. En la famiya todos estavan detras de
mi. Ma no savía ke aviya tomado un kamino largo. Mi plan era ke kada vez ke la
vijitava, de demandarle una resefta sin kansarla.
Ma yo nunka entri en la kozina kon mi madre. Anyos i anyos preparimos mezas de
fiesta, ma yo nunka miri ke karar de sal o asukar metiya. Toka la oreja para pueder
azer la masa de los biskochos me diziya. De ke oreja estamos avlando?“Mete el karar
de arina ke toma.” Estas eran las mezuras. Ke atrevimiento sería de demandarle estas
mezuras. En la kaza de mi ija, en el etranjero, kuando empesi a gizar, entendí ke la
marka de la arina, la umidad del lugar, aze diferensia. Mete una kuchara no muy
yena, si ay metes; si no, no importa. Estas palavras eran para mi kozas de riir. Un
poko de sal en el mallebi, una gota de limón a la masa de biskochos (i si no ay,
vinagre), un poko de asukar en el peshkado u en la bamya… Emposible de entender!
Mi madre dizía solo “al ojo”, nada mas. Esto era la eksperiensia. I la eksperiensia es
difísil de trasmitir.
Kreo ke eya nunka se olvidava de meter su amor en sus komidas.
En los tiempos viejos, kuando no avía supermarkados, bivía un bakal ke en kada kosa
ke pesava, metía un poko mas. El aprendisto, ke estava viyendo, le demando deke
aziya ansina. El bakal respondió: “Esto es mi azlaha..."
Difísil de akseptar, ma no difisil de entender…En la siensia de las mezuras, ay tres
kozas importantes: la verdad, la presizyon, i la konfiansa. Mozotros adjustamos una
otra: la toleransia.
Pensando ke en toda koza ay un poko de error, la toleransia se aze una virtud.
En los tiempos antiguos, las mezuras se tomavan del puerpo del ombre: el dedo, la
karish, la mano.
Despues de la Revolusión Franseza, vino la igualita tanbien en las mezuras. Se
krearon los standardes para ke no ayga diferensya de un paíz al otro.
El mas kurto tiempo es “un momento”.
Se dize ke el Dio i el ombre avlavan:
—Dio mío, ke es para Ti un segundo en el universo?
—Un milyón de anyos, ijiko mío.
—I kuando va vinir la paz al mundo?
—Ya va vinir, ijiko… espera solo un segundo.
Esperar por la paz merese la espera…
Kuando kería apanyar las resetas de mi madre, pensí:
Ken es mas reushito? Los ke kaminan kon la balansa komo formasyan, o los ke se
fían en sus ojos i sus korason?
