Shavuot es una fiesta partikular de otras relijiones monoteistas, komo Pesah ke se nombra la Paque o Shavuat ke toma el nombre de Pentakot. Se puede pensar a identifikar a la fiesta de la Rekolta. Ma Sukot tyene munchas liturjias diferentes en partikular ke empesa kon Oshana Raba ke se eskapa kon Simhat Tora, syete dias despues.
Sukot mos akodra la salidura de Ayifto, los 40 anyos en el dezyerto de Sinay, la disparisyon de la vieja jenerasion ke salyo de Misrayim, i la mueva ke nasyo en el dezyerto i ke se olvidaron el buto de la saviduria del esklavaje. Esta fyesta es plasada en la Tora, ke mos komanda de komer i durmir en la Suka, i komer 14 Seudas en 7 diyas. En Judea, en el tyempo del segundo Bet Amikdash, esta komandado solo 7 diyas durmir i komer.
Era el uzo de trayer 70 korbanotes en la onor de los 70 puevlos de la tierra. Durando esta fiesta kada una de los Sefirot inferiores, kada diya de fiesta es plasado debasho el sinyo de un invitado ke mos ambeza una kalidad divina: Avraam, Yitshak, Yaakov, Moshe, Aaron, Yosef i David los ke yamaron (Ushpezim), invitados, son muestros Padres keridos.
Ay siertas komunidades ande se resive envitados Sakros, tambien nombravan kon sus espozas, se dize Avram Avinu Vaayato Sara, Itshak Avinu Vaayato Rivka, i ansi se kontinua los nombres Yaakov kon Rahel ve Lea i todos muestros Padres.
Sukot da muncho a pensar. En la Suka biveras 7 diyas kon meza, siya, kolchon, kolcha i todo lo demenester. La Suka dunke es una morada pasajera komo muestra vida larga u kurta, un pasaje en el tiempo. El buketo tambien es un sembol de un puevlo kon miembros diferentes. El Etrog, Lulav, Hadas, Arova los unos dulse kon una golor ermoza i tambien savrozo; otros sin savor sin golor. I otros kon golor ma sin savor i otras plantas kon savor ma sin golor…
Todas estas plantas forman un buketo kon ermozuras i mankuras ma endjuntos forman una fuersa spesial, invizible kon sus miembros diferentes ke nada no puede destuir.
Sukot mos ambeza tambien ke nada no es durable, kada morada, kada rikeza, kada ermozura es pasajera i muestra vida larga o kurta es un pasaje en el tiempo. Kada sukseso es una viktorya ke pasa komo un pasharo bolando, i ke se poza enriva de un techo.
Pas i alegriya en todo el Mundo!
